DILI (timorpost.com) – Kazu Longuinhos Monteiro, asegura kilat lolon tolu iha nia rezidénsia, Komandante Jerál Polisia Nasionál Timor-Leste (PNTL), Komisáriu Polisia Faustino da Costa, hatete lei la fó dalan ba Eis Komisáriu PNTL atu rai Kilat iha uma.
“Ita-nia estatutu profisionál ba funsaun Polisia Nasionál Timor-Leste, dekretu lei númeru 69/2022, 28 Setembru ne’e bandu eis Komisáriu PNTL sira, atu rai kilat iha uma,” nia hateten hafoin fó apresiasaun ba Komandante Komandu Operasaun sira iha Kuartél Jerál PNTL, Kaikoli Dili, Kuarta (18/01).
Nia dehan, ba sira ne’ebé remata ona funsaun hanesan Komandante Jerál ou Segundu Komandante Jerál, sira sei nafatin iha direitu ba eskoltu no mós viatura ofisial estadu nian.
“Ha’u atu hatete de’it katak ita laiha lei ida iha Timor hodi dehan se de’it bele iha kilat no sei de’it ka bele hola kilat,” nia hateten.
Alende ne’e nia haktuir, kuaze iha tinan 10 liubá, Estadu liuhusi Parlamentu dezeña duni lei atu eis Komisáriu PNTL sira, atu lori kilat, maibé no fim lei ida ne’e la pasa, tanba ne’e lei estatutu orgánika PNTL atuál la fó dalan atu eis Komisáriu PNTL bele lori Kilat ba iha uma.
“Ha’u hakarak atu dehan, hanesan Komandante Jerál, ha’u antes ne’e hanesan Segundu Komandante Jerál, bainhira Senhor ne’e husik kargu hanesan Komandante, hodi assume fali hanesan Ministru no iha Ministériu Interior mak kuaze tinan hira ita hotu hatene iha ne’ebá, tanba ne’e iha kontaktu ho Eis Ministru Interior, Longuinho Monteiro,” nia hateten.
Nia reforsa tan, tanba ne’e laiha kontaktu rutinas ho Eis Komandante ne’e, kuandu iha tempu ne’ebá ema hotu akompaña iha situasaun polítika, maibé iha momentu ne’ebá seidauk iha estatutu iha tempu ne’ebá, tanba Eis Komandante ne’ebé assume tinan balun hanesan Komandante PNTL, entaun bele iha posibilidade, tanba lei laiha.
“Hafoin ita simu informasaun barak, entaun no fim eskoltu na’in-rua ne’ebé Komandante momentu ne’ebá atribui, ita retira hotu kedas inklui armas sira ne’ebé ita atribui ba eskoltu sira ne’e mós ita foti,” nia konta.
Tanba ne’e, daudaun PNTL sira-nia armas kompletu no kilat boot ho pistola iha komandu hotu laiha ida mak sai ka lakon.
“Ha’u hanoin dezde ha’u assume hanesan komandante jerál, ita laiha kontaktu ofisial ka rutinas, mais depois de sai hanesan asesór Prezidente dala-ruma enkontru mak konsege hasoru malu,” nia hakotu.
2,416 total views, 3 views today
Bele hare Video Seluk :