DILI (timorpost.com) — Atu garante pas no estabilidade iha rai laran, Komandu Polisia Nasionál Timor-Leste (PNTL), liuhusi Komandu Munisípiu sira, iha tempu kalan halo operasaun no hala’o pasa revista.
Portavós Komandu Jerál PNTL, Superintendente Xefe Arnaldo de Araújo, hatete relasiona ho krime ne’ebé akontese iha Dili, tanba ne’e mak iha tempu kala PNTL hala’o operasaun no pasa revista, hodi evita ema kriminozu sira, la bele lori sasán ko’ak iha transporte sira hanesan karreta ho motor.
“Ami Polisia Nasionál Timor-Leste (PNTL), iha Territóriu laran tomak halo hela servisu, liuliu iha Dili, hala’o hela pasa revista, hanesan motor no karreta ba iha fatin hotu-hotu, atu nune’e evita karik iha ema balun estraga estabilidade,” nia hateten iha Komandu Jerál PNTL, Kaikoli, Tersa (10/01).
Nia dehan, PNTL halo operasaun no pasa revista ne’e, iha fatin ne’ebé de’it PNTL la haree iha area risku no la haree iha area ne’ebé laiha risku, PNTL nia servisu iha kualkér parte hotu no pasa revista iha fatin hotu-hotu.
“Ami hanoin PNTL identifika ona fatin risku ba konflitu, maibé ida ne’e ha’u la bele hato’o ba ita boot sira, fatin risku ne’e iha ne’ebé, maibé ida ne’e ami PNTL mak hatene, ami la bele dehan sai fatin refere, atu nune’e iha ami ba halo pasa revista, para bele identifika ema sira ne’ebé hanoin aat,” nia informa.
Alende ne’e Komandante Arnaldo, hatete PNTL nia servisu iha 24 oras, kazu ne’ebé akontese ne’e, sira bele hateten balun mai ho planu no grupu, tanba ne’e sira-nia parte la bele hatene katak kazu ne’e sei akontese iha ne’ebé, maibé hafoin akontese tiha mak foin sira ba to’o iha fatin akontesimentu.
“Dala-barak ema dehan ami Polisia la halo servisu, maibé Polisia ne’e iha nia prezensa iha fatin hotu-hotu, mais depende ema ida-idak nia konxiénsia, atu nune’e tetu hafoin halo krime,” nia hateten.
Nune’e mós nia hateten, sira-nia parte hanoin PNTL nian dixiplina sei iha, sira hatene PNTL iha ne’ebé, buat ida akontesimentu ne’e, ema hotu la espera, buat hotu mosu, PNTL agora iha fatin hotu mak hanesan iha postu PNTL, tanba ne’e akontese ruma iha bairru ka iha fatin ne’ebé de’it kontaktu ba autoridade seguransa, atu nune’e bele to’o iha fatin refere.
1,860 total views, 3 views today
Bele hare Video Seluk :
Subscribe to Timorpost
