DILI (timorpost.com) – Polisia Nasional Timor-Leste (PNTL), liuhusi Tránzitu Munisípiu Dili, iha loron boot Natal, prende motorizada 12 no karreta pesadu tolu.
“Durante loron boot Natal iha dia 24 ho 25, ami prende transporta hamutuk 15, motorizada 12 no karreta pesadu 3, ” hateten Komandante Tránzitu Munisípiu Dili, Inspetór Xefe Domingos Sarmento Gama, iha knaar fatin Komandu PNTL Munisípiu Dili, Segunda (26/12).
Nia dehan, motorizada 12 ne’ebé parte tránzitu prende ne’e, tanba viola regra lei kódigu estrada iha area jurídiku Dili, nune’e mós karreta pesadu 3 ne’e, viola regra despaxu konjuntu entre Ministériu Transporte Telekomunikasaun (MTC) ho Polisia Nasional Timor-Leste (PNTL), atu la bele halo sirkulasaun iha tempu loron.
“Iha loron boot natal, realialidade karreta pezadu sira kontinua halo movimentu iha loron, maibé tanba ita rekursu la to’o atu aloka ba iha ne’ebá, maibé kuandu halo movimentu mak ita-nia membru tránzitu hetan sei prende,” nia dehan.
Nia hatutan, maski rekursu la to’o, maibé sira-nia parte kontinua halo operasaun no pasa revista iha Dili, kuandu hetan parte PNTL prende.
“Tanba ne’e, ita apela ba kompañia sira, atu kumpre despaxu konjuntu ne’ebé ami halo ona, atu la bele sirkula iha loron, nune’e mós ita apela komunidade sira atu la bele viola regras lei kondigu estada,” nia hakotu.
Enkuantu tuir observasaun Online Timor Post iha terenu, daudaun ne’e motorizada ho karreta pezadu iha hela resintu Tránzitu Munisípiu Dili, hafoin sira kumpre sira ba selu multa foin bele foti sira-nia transporte.
1,623 total views, 6 views today
Bele hare Video Seluk :