DILI (timorpost.com) – Adjunta Diretora Jerál Serbisu Imigrasaun, Inspetora Xefe Polisia Adelaide de Rosa, informa hahú hosi fulan Janeiru to’o Novembru, Servisu Imigrasaun konsege deporta sidadaun estranjeiru na’in-42.
“Durante iha fulan Janeiru to’o mai iha Fulan Novembru, ita rejista ema tama no sai iha territóriu nasionál hamutuk 8.000 resin, hosi dadus ne’e ha’u klasifika sai ema na’in-42, maka ita halo operasaun nune’e ita halo abandona voluntáriu ka deporta sai husi territóriu nasionál,” nia hato’o lia hirak ne’e iha knaar fatin Ministériu Interior, Vila-Verde, Segunda (05/11).
Nia dehan, ema ne’ebé parte Servisu Imigrasaun deporta maioria hosi nasaun viziñu Indonézia hamutuk ema ni’an-34, Kambodia na’in-6, husi Pakistaun na’in-1 no Bangladesh na’in-1.
“Ema ne’ebé ita deporta ne’e, maioria mai ho vistu turista no maioria sira halo atividade negósiu ki’ik sein autorizasaun,” nia konta.
Alende ne’e aprezenta hahú Janeiru to’o Novembru Servisu Imigrasaun kolleta reseita hamutuk Miliaun 1.4. USD.
“Reseita ne’ebé ita kolleta ne’e, mai husi sidadaun viajen sira ne’ebé sosa viza on arrivel, ne’ebé ita aplika iha Postu Serbisu Imigrasaun sira hotu-hotu no inklui postu aeroportu, postu portu Dili, no iha Portu Tibar inklui extensaun vistu sira iha sede serbisu imigrasaun no selu koimas ne’ebé ita hetan liuhusi operasaun no multa sira ” nia hateten.
Tanba ne’e, nia dehan, Servisu Imigrasaun sei halo mekanizmu kontrolu ne’ebé rigorozu liután iha fatin refere no iha tempu badak servisu Imigrasaun prevee ona orsamentu oinsá atu estabelese rejiaun sira iha Munisípiu Baukau, atu nune’e bele kotrola iha parte Leste nian.
“Nune’e mós, ita prevee ona osan sei monta delegasaun territorial ida iha Suai hodi kontrola Munisípiu haat no Oe-kuse ne’ebé agora estabelese tiha ona, ita sei halao mekanizmu oinsá atu nune’e bele kontrolu di’ak liután iha pontu entrada sira iha futuru,” nia hakotu.
2,153 total views, 6 views today
Bele hare Video Seluk :