DILI (timorpost.com) – Relasiona ho asidente entre karreta mikrolete ho ambulánsia iha parte Hera, Polisia Nasionál Timor-Leste (PNTL) liuhusi Polisia Tránzitu Munisípiu Dili, hakarak apela ba kondutór Ambulánsia sira, atu hatene nia funsaun oinsá atu uza lampu Emerjénsia.
Komandante Tránzitu Munisípiu Dili, Inspetór Xefe Domingos Sarmento Gama, hatete tuir loloos karreta Ambulánsia sira, bainhira iha ema moras, kanek no mate hafoin bele uza lampu Emerjénsia, maibé bainhira la tula ema moras, kanek no mate la bele uza lampu Emerjénsia no la bele halai ho velosidade ne’ebé makas.
“Ita apela ba kondutór sira parte Ambulánsia nian, sira la bele uza oportunidade bainhira la tula ema moras, kanek no mate, maibé sira uza lampu Emerjénsia, hakarak ultra pasa lalais no to’o lalais,” nia hateten iha knaar fatin, Kaikoli, Kinta (24/11).
Nia dehan, tuir nia haree dala-barak kondutór Ambulánsia sira uza oportunidade ida ne’e, atu ultra pasa lalais, maibé sira la hatene katak ida ne’e mós foti risku, maibé kuandu mosu asidente ruma mak prosesu la’o identifika laiha Emerjénsia ruma mak sira uza lampu Emerjénsia, ne’e kategoria kondutór viola regra no liuliu viola regra kódigu estrada.
“Ita hatene, Ambulánsia iha oin rua, Ambulánsia ida tula ema mate no Ambulánsia ida seluk tula ema moras no kanek, tanba ne’e kondutór hatene nia funsaun, bainhira tula ema moras, kanek no mate hafoin bele uza lampu Emerjénsia,” nia esplika.
Alende ne’e nia hakarak apelu mós ba iha parte Ministériu relevante, atu hato’o ba kondutór sira kona-ba regra lori karreta Ambulánsia, bainhira sira rekruta tenke tuir formasaun, para komprende didi’ak nia funsaun, se lae mosu asidente ruma bele halakon ema seluk nia vida.
Ikus nia dehan, foti kestaun ne’e la signifika, akontese asidente ida iha Hera, funsionáriu husi Ministériu Saúde no liuliu Ambulánsia mak sala ka karreta Mikrolete mak sala, la julga ema ida, maibé ida ne’e sei iha hela prosesu Tribunal mak sei deside se mak sala no los.
1,199 total views, 3 views today
Bele hare Video Seluk :
Subscribe to Timorpost
