DILI (timorpost.com) – Atu evita dezastre no konflitu, Polisia Nasionál Timor-Leste (PNTL), Bandu adeptu sira hosi nasaun ne’ebé joga iha kopa Mundiál 2022, halo kampañia iha area juridiku Munisípiu Dili.
Portavós Komandu Jerál PNTL, Superintendente Xefi Arnaldo de Araújo, hakarak informa ba ema hotu, katak agora mundu tomak haree no akompaña hela joga kopa Mundiál, ema hotu hatene iha ema fens nasaun ida-idak.
“Maski, iha ema ida-idak fens tuir nasaun ida-idak, maibé kuandu nasaun ne’ebé manan la halo kampañia iha estrada públiku no iha ne’ebé de’it, banhira se halo PNTL sei halo atuasaun hasoru sira,” nia hateten iha Komandu Jerál PNTL, Kaikoli, Kuarta (23/11).
Nia dehan, banhira halo kampañia, bele mosu provokasaun entre adeptu sira, tanba ne’e PNTL Bandu atu halo kampañia iha fatin ne’ebé de’it.
Tanba ne’e nia husu ba joven ka adeptu sira, banhira joga final mak iha nasaun ne’ebé manan mós sei la halo kampañia iha fatin ne’ebé de’it.
“Halo kompañia sei mosu konfrontu, tanba ne’e sei la autoriza atu halo kampañia, nune’e mós ita boot sira viola kódigu estrada 06/2013, ne’ebé dehan la bele halo kampañia,” nia hateten.
Alende ne’e nia mós hakarak hato’o ba joventude sira atu la bele dada bandeira nasaun ne’ebé ida-idak fens, aas liu fali bandeira Nasional, bandeira Nasional ne’e, ema hotu fó nia ran no ruin mak hetan bandeira ne’e.
“Ita tenke tara aas liu bandeira Nasional, bandeira nasaun ne’ebé tuir ema ida-idak nia fens tau iha okos,” nia dehan.
Ikus nia dehan, loron hira tan, atu tama ba 28 Novembru, Loron Proklamasaun Independénsia Da-47, tanba ne’e husu ba inan-aman no joven sira atu dada bandeira Nasional iha ida-idak nia uma, la’ós dada fali Bandeira nasaun seluk nian.
864 total views, 9 views today
