DILI (timorpost.com) – Membru Polisia Nasionál Timor-Leste (PNTL), na’in-9 husi Komandu Munisípiu Dili, ne’ebé hetan suspensaun durante loron 60 ligadu ho kazu suspeitu José Bernardo de Jesus, nia mate iha sela detensaun Kaikoli, tama hikas servisu.
Komandante PNTL Munisípiu Dili, Superintendente Xefe Polisia Henrique da Costa, informa membru na’in-9 ho inisiál AS, MS, AQ, LS, TV, FADA, AAM no TDCP, ne’ebé hetan suspensaun preventiva husi Komandu Jerál, relasiona ho kazu José Bernardo de Jesus nia mate iha sela detensaun Kaikoli, durante 60 nia laran remata ona, tanba ne’e tama hikas servisu hanesan bai-bain.
“Ita-nia membru na’in-9, ne’ebé pikete iha Kinta (01/09) ho momentu hanesan matebian José Bernardo de Jesus mate ho kondisaun tali iha kakorok iha sela detensaun Komandu PNTL Dili, iha fulan rua ba kotuk ne’e, sira hetan suspensaun preventiva husi Komandu Jerál, maibé daudaun ne’e sira kompleta ona loron suspensaun preventiva loron 60, tanba ne’e, agora sira halo sira-nia servisu hanesan bain-bain,” nia hateten knaar fatin Kaikoli, Kuarta (09/11).
Maibé, Komandante PNTL Munisípiu Dili, ne’e hakarak hatete, mezmu sira tama hikas ona servisu hanesan bain-bain, maibé prosesu hotu-hotu sei la’o, seidauk hatene nia finalidade, hanesan agora sira hetan despaxu hodi servisu hanesan bain-bain ne’e.
“Ha’u hakarak hatete, prosesu kona-ba kriminál no dixiplinár sei kontinua, tenke liu prosesu mak ita foin hatene nia kontinuasaun ne’e oinsá,” nia esplika.
Nia reforsa tan, Membru na’in-9 ne’e, nia prosesu dixiplinár ne’e la’o nafatin, tanba sira hetan suspensaun preventiva, entaun atu haree kona-ba prosesu sira seluk, tanba dala-ruma la’ós sira na’in-9, maibé bele mós liuhusi na’in-9 ne’e, tan ne’e, signifika liuhusi prosesu mak bele determina.
“Ita-nia membru na’in-9 ne’e, sira hahú tama hikas fali servisu no sira-nia saláriu la’o hanesan normal,” nia hakotu.
2,603 total views, 3 views today
Bele hare Video Seluk :
Subscribe to Timorpost
