DILI (timorpost.com) – Komisáriu Jerál Polísia Nasionál Timor-Leste, Faustino da Costa, lakohi fó komentáriu kona-ba progresu kazu tara-an iha sela detensaun Kaikoli, Jose Bernardo, tanba Polísia Sientífiku Investigasaun Kriminál (PSIK) mak atende.
“Ha’u la ko’alia kona-ba progresu kazu, maibé prosesu interna PNTL nia la’o hela, no ita halo hela suspensaun ba ita-nia membru sira balun, hodi kontinua prosesu,” nia hateten iha Sentru Formasaun Polísia, Komoro, Segunda (26/09).
Nia aumenta, tanba kazu ida ne’e Ministériu Públiku (MP), delega kompeténsia ba iha Polísia Sientífiku Investigasaun Kriminál (PCIC), hodi atende krime ida ne’e.
Ho ida ne’e nia parte la ko’alia kona-ba progresu kazu sidadaun tara-an iha sela ne’e ninian, maibé sira nia parte halo investigasaun internal PNTL ninian.
“Maibé ita-nia membru sira halo suspensaun ne’e mós la signifika sira sala ona, maibé ita hasees sira husi sira-nia fatin hodi submete ba iha prosesu investigasaun,” dehan nia.
Komandante ne’e reforsa, maibé sira halo ona suspensaun ba membru PNTL na’in-8, tanba ne’e kuandu rezultadu investigasaun sira sei halo publikasaun, karik membru PNTL iha indikasaun envolvimentu ba kazu ne’e ka lae.
Atu hakotu nia subliña, kona-ba kazu Padre Abito José Casimiro Brites nia mate ne’e mós sira halo tiha atendimentu prosesu investigasaun iha PSIK mak kaer hotu, tanba ne’e nia parte labele fó komentáriu ba ida ne’e.
1,371 total views, 3 views today
Bele hare Video Seluk :
Subscribe to Timorpost
