DILI (timorpost.com) – Polisia Nasional TImor Leste (PNTL) liuhosi Sentru Formasaun Polisia (SFP) Komoro, fasilita formasaun Ba pesoál guarda sira Hospital Nasionál Guido Valadares (HNGV) nian durante loron 10.
Formasaun ne’e, abertura husi Komandante Operasaun Nasionál PNTL, Superintendente Polisia Pedro Belo.
Komandante Operasaun Nasionál PNTL, Superintendente Polisia Pedro Belo, hatete iha nia diskursu, katak kursu ida ne’e importante tebes-tebes, tanba kursu ba guarda seguransa sira iha Hospital Nasionál Guido Valadares (HNGV) presiza duni iha koñesimentu tékniku no tátika, se guarda seguransa laiha koñesimentu hanesan mós ema bain-bain hamriik iha odamatan.
“Tanba ne’e, ha’u-nia lia-menon antes atu tama ba formasaun ho imi-nia formadór sira, sei fó koñesimentu matenek oin-oin ba ita-nia maluk sira,” nia diskursu iha sentru formasaun polisia (SFP) Komoro, Segunda (19/09).
Nune’e, nia husu ba formadu sira, atu aproveita tempu didi’ak iha loron 10 ne’e, tanba loron 10 ne’e la’ós tempu naruk, tanba ne’e tenke aprende didi’ak.
“Formasaun ne’e, ha’u hanoin maluk sira guarda HNGV atu aprende oinsá atu halo perkiraan iha ne’ebá, oinsá komunikasaun ho ita-nia maluk sira HNGV ne’ebá,” nia dehan.
Iha fatin hanesan, Diretór AFL HNGV, Raul Humberto Gama, hatete sira para fó agradese ba akademia polisia sentru formasaun ida ne’e, tanba ho sira-nia disponibilidade bele atende sira-nia proposta atu bele hala’o sira-nia formasaun ba sira-nia membru guarda seguransa iha HNGV.
“Ita hotu hatene katak, ita loron-loron hasoru Guarda sira iha Hospital Nasionál Guido Valadares, enkuantu sira-nia atedementu dala-ruma la hanesan reprezenta seguransa, tanba durante ami iha Hospital Nasionál ami haree dala-ruma sira atendimentu no komunikasaun ho pasiente sira, pasiente sira família la hanesa ho guarda seguransa,” nia dehan.
Tanba ne’e, sira presiza tuir formasaun kona-ba guarda, atu nune’e oinsá atu atende ba ema sira iha Hospital Nasionál Guido Valadares.
“Tanba ne’e, ohin ami servisu hamutuk ho sentru Polisia nian, ohin ita hala’o serimónia abertura ba formasaun guarda seguransa Hospital Nasionál Guido Valadares nian,” nia hateten.
Guarda iha HNGV hamutuk 40, kompostu husi mane 39 ho feto na’in-ida, sira ne’e sei fahe ba faze rua, faze primeiru nain-20 mak sei tuir uluk formasaun durante loron 10 no mós faze segundu nain-20 mós sei tuir kursu durante 10.
“Ita-nia guarda sira ne’e oinsá atu servisu guarda iha Hospital Nasionál Guido Valadares oinsá atu atende ema, tanba HNGV ema halo movimentu barak entaun guarda sira tenke halo seguransa iha 24 oras, oinsá atu atendiementu ba pasiente no ba ema seluk,” nia saliente.
Entaun, presiza halo formasaun ba guarda sira ne’e, para oinsá sira servisu mós entermu personal ne’e pelumenus iha kapasitasaun no servisu hamutuk ho sentru formasaun polisia nian.
Xefe Formasaun Interinu, Julio Ximemes Barboza, hatete kona-ba formasaun ne’ebé sentru formasaun Polisia sei aplika ne’e, liuliu kona-ba komunikasaun no maneira oinsá mak uza istik, patrullamentu la’o ain oinsá sira uza halo tráfegu seguransa iha HNGV.
“Nune’e mós, oinsá ita fó formasaun sira halo komunikasaun ba ita-nia vigilantes sira ne’ebé iha HNGV,” nia dehan.
Ikus nia dehan, HNGV foin mak primeira vés, sira fó formasaun, maibé formasaun refere sira fó ba iha guarda prizaun no mós ba iha Saneamentu Dili.
1,889 total views, 3 views today
Bele hare Video Seluk :
Subscribe to Timorpost
