DILI (Timor Post) – Polisia Nasionál Timor-Leste (PNTL), Komandu Munisípiu Dili, detein suspeitu nain-rua SDF ho idade (44), nu’udar profesór husi Munisípiu Manufahi no JM (42), hosi Rejiaun Administrativu Espesiál Oe-kusse Ambeno (RAEOA), tanba bosok vítima sira hatama osan ho montante 10 USD, hodi trata dokumentu atu hetan apoia hosi Ministeriu Solidaridade Sosiál no Inklusaun (MSSI).
Komadante PNTL Munisípiu Dili, Superentidente Xefe Polisia Henrique da Costa, informa ohin dadersan mais ou menus tuku 06:00, komandu PNTL Munisípiu Dili, partikularmente eskuadra Dom Aleixo simu informasaun katak iha kazu burla ida ka ema bosok sidadaun sira iha area Dom Aleixo nian.
Nune’e, parte patrolia ho servisu informasaun Polisia no makikit ba kedas iha fatin akontesementu no identifika katak iha duni Mane ida ba iha komunidade nia uma hodi bosok promete katak komuidade sira hatama dokumentu ho osan pois bele trata dokumentu ba sira, atu nune’e hodi prosesu ba iha apoiu Josi MSSI.
“Tanba ita-nia patrolia Dom Aleixo ho Makikit ba kedas iha fatin no halo kedas kapturasaun ba suspeitu ne’e no bolu kedas ho vítima sira ba iha eskuadra Dom Aleixo ita halo identifikasaun konsege identifika tan autor prinsipál ida iha area Vera-krús nian, entaun patrolia Vera-krús nian ba kedas iha fatin autór ne’ebé hela iha Dare nian no foti kedas autór prinsipál lori mai halo prosesu,” nia hateten iha knaar fatin Komandu PNTL Kaikoli, Kinta (25/08).
Nune’e, daudau parte eskuadra Vera-krús sei hala’o hela prosesu ba vítima hamutuk 200 resin ne’ebé hatama ona dokumentu ho osan ema ida 10 USD, para fó suspeitu atu nune’e hatama dokumentu ba hodi hetan apoiu husi MSSI.
Nia dehan, osan ne’e vítima sira la fó direitamente ba iha autór sira, maibé fó liuhusi vítima nia kolega ida, entaun ba vítima nia kolega ne’e mak ba entrega iha autór ne’e, vítima identifika katak autór ne’e rasik nia uma nia kondisaun la favoravel ida, entaun nia mosu deskonfia husi vítima, entaun vítima la entrega osan ba suspeitu ne’e.
Nia dehan, sira halo atividade iha Munisípiu Dili ho RAEOA hodi bosok vítima, maibé vítima sira ikus mai deskobre ema ne’e bosok, tanba kantór no uma atu halo servisu ajuda vítima fatin la seguru, nune’e, daudaun ne’e, suspeitu sira halo ona prosesu depois haruka ba iha Ministériu Públiku.
“Osan balun ne’ebé vítima sira hamata uluk ho dokumentu sira ne’ebé ita halo apreensaun husi autór sira agora asegura ne’e hamutuk 90 USD, maibé osan 200 USD, mak vítima sira la konsege entrega ba suspeitu sira,” jakotu nia.
Alende ne’e Nia dehan, suspeitu prinsipál hosi Munisípiu Manufahi, nune’e parte Komandu PNTL Munisípiu Dili, halo komunikasaun ona ho parte Manufahi nian, atu nune’e ajuda asegura hela suspeitu ne’e, depois mak sira-nia parte ba foti.
Iha fatin hanesan, vítima Roza Maria de Fatima Taicolo, hatete ema ne’ebé bosok komunidade sira ne’e dehan hamata osan ho montante 20 USD no dokumentu para malae atu ajuda komunidade sira ne’ebé ki’ak.
“Ema ne’e bosok ami dehan Malae husi Manufahi hatete ba maun João Mesquita, hatete ba ami atu hatama osan 20 USD, no dokumentu sira atu loke rekening, depois Governu sei haruka osan liuhusi rekening ne’e,” dehan vítima Roza iha Komandu Munisípiu Díli, hafoin presta deklarasaun iha PNTL Eskuadra Vera-Kruz, Kinta (25/08).
Nia dehan, ema bosok komunidade sira hatama dokumentu hanesan sertidaun RDTL, Sertidaun Baptismu, Kartaun Eleitorál, Bilete Indetidade (BI) Kopi foto kolorizdu 3×4 tahan tolu no osan 20 USD atu loke rekening.
“Ami la hatene ema ne’e bosok ami, ema dehan malae husi Manufahi atu ajuda ami hetan osan mak ami halo tuir saida de’it, maibé ami to’o iha Siga nia fatin haree uma ne’e kondisaun la di’ak, ami deskonfia ona ema ne’e dala-ruma bosok ita, nune’e ami deside la hatama osan, ami fila fali de’it,” nia informa.
Nia dehan, ema ne’e ba iha Oe-Kuse mak bosok komunidade sira, atu lori tuir dokumentu ho osan mai hatama hodi loke rekening, maibé to’o iha Dili, ema ne’e nia uma la di’ak, ami husu hatam kartaun husi Governu mós laiha, tanba ne’e sira deside hato’o keixa ba PNTL atu halo kapturasaun.
“Ema ne’e ba iha Oe-Kuse, Ko’alia ba ami dehan Malae, tanba ne’e ami horisehik mai husi Oe-Kuse, ohin atu mai hasoru malae ne’e atu hatama dokumentu ho osan, ami haree nia uma kondisaun la di’ak, entaun ami deskonfia katak ema ne’e bosok,” nia hakotu.
Iha biba ne’e, Xefe Grupu hanesan João Mesquita, hatete ema ida sidadaun dehan naran Malae ba iha RAEOA hodi hatete ba komunidade sira kona-ba kondisaun moris hanesan ema ki’ak, entaun sira atu ajuda sira ho maneira dehan hatama dokumentu ho osan hodi hetan osan husi rekening ne’e.
“Nune’e, bainhira ami rona ida ne’e, ami organiza komunidade sira hili ha’u hanesann Xefe Grupu atu rekola dokumetu ho osan sira ne’e, atu lori mai hasoru malae ne’e, atu ajuda halo ami nia rekening atu hetan osan husi Governu,” nia hateten.
Nune’e, mak ohin sira to’o iha Dili, atu hasoru malae atu hatama dokumentu ho osan, maibé husu karta rekoñese husi Governu laiha, entaun sira deside la hatama domumentu ho osan ne’e, sira deskonfia katak ema ne’e los malae no bosok.
“Tanba ne’e, ami mai hato’o keixa ba autoridade seguransa PNTL, atu halo kapturasaun ba suspeitu ne’e,” nia hakotu.
1,443 total views, 3 views today
Bele hare Video Seluk :
Subscribe to Timorpost
