DILI (Timor Post) – Polísia Nasionál Timor-Leste (PNTL), nia estatístika hahú husi fulan Janeiru to’o iha fulan Agostu tinan 2022, hatudu sira rejista kazu asidente Tráfegu kontese iha territóriu laran tomak hamutuk 1.336, rezulta ema nain 61, mak lakon vida iha estrada públiku.
Porta-vós Relasaun Públika Komandu Jerál (PNTL), Superintendente Xefi Armando Monteiro, hatete kazu asidente Tráfegu ne’ebé akontese durante iha fulan Janeiru to’o iha fulan Agostu nia laran ne’e, PNTL rejista asidente Tráfegu hamutuk 1.336, mak akontese iha territóriu laran tomak no rezulta sidadaun nain 61 mak lakon vida iha estrada públiku.
“Asidente tráfegu hira ne’e akontese envolve karreta ho motor sidadaun sira konduz transporte halai la kontrola aan hakarak ansi atu to’o lalais hodi rezulta monu mesak, soke malu ida ne’e mak durante ne’e akontese, iha fulan ualu nia laran, ita rejista hamutuk 1.336 no lakon vida hamutuk 61 iha estrada públiku,” dehan Armando liuhusi konferénsia imprensa iha Kuartel Jerál PNTL, Kaikoli, Kuarta (24/08).
Nia dehan, durante hahú iha fulan Janeiru to’o iha fulan Agostu nia laran akontese asidente tráfegu iha estrada públiku envolve transporte karreta ho motor rezulta vítima ne’ebé lakon vida hamutuk 61, kanek grave iha 289 no kanek kaman iha 1.522, husi númeru ne’e mak total hamutuk 1.336.
“Ita husu ba sidadaun se-se de’it iha karreta ho motor bainhira viajen respeita lei kódigu estrada, bainhira kondus motor tenke uza kapasete atu bele sala imi-nia vida bainhira envolve iha asidente tráfegu, tanba ita ema la faan hanesan karreta ho motor, mate ne’e hotu ona, ida ne’e mak ita husu atu kuidadu nafatin uza transporte,” nia informa.
Nia dehan, asidente tráfegu sira ne’e akontese maioria, motorizada, tanba sidadaun sira halai la kotrola aan, depois la uza kapasete, bainhira akontese asidente rezulta kanek todan no kanek kaman no mós lakon sira-nia vida iha estrada públiku.
“Asidente tráfegu ema atu la bele lakon vida iha estrada públiku, ita husu hotu-hotu tenke iha konxiénsia respeita ba regra sira hotu, nune’e mós husu ba sira ne’ebé kondus karreta ho motor, tenke halai ho velosidade neineik uza kapasete atu bele salva vida bainhira envolve asidente tráfegu,” hakotu nia.
1,288 total views, 3 views today
Bele hare Video Seluk :