DILI (Timor Post) – Polisia Nasionál Timor-Leste (PNTL), husi Seksaun Polisia Tránzitu Munisípiu Dili, durante semana ida rekolla reseita Rihun 7 USD, mak hatama ba iha Kofre Estadu.
Informasaun ne’e, hato’o husi Xefi Seksaun PNTL Tránzitu Munisiipiu Dili, Inspetór, Domingos Sarmento Gama, hatete iha nia knaar fatin Kaikoli, Segunda (08/08).
“Iha semana ida nia laran ita konsege hatama reseita hamutuk rihun 7.787.00 ba iha kofre Estadu, osan sira ne’e, ita hetan husi evidénsia transporte no dokumentu sira ne’ebé ami polisia prende, nune’e mak ami prega multa ba infrator sira hamutuk 181, husi númeru ne’e mak ita hatama osan ba iha kofre estadu,” nia aprezenta.
Nia dehan, atividade operasaun ba transporte iha kapitál Dili kontinua la’o, tanba ne’e mak iha semana ida nia laran PNTL prende kareta ho motor hamutuk 150 ne’ebé viola regra infrasaun nian.
“Iha semana ida hahú iha loron 30 Jullu to’o 05 Agostu, ita konsege prende tranporte kareta mikrolete tolu, privadu tolu ho motor privadu hamutuk 141 no motor Governu hamutuk tolu no inklui dokumetu tolu, mak ita prende viola infrasaun lei kodigu estrada,” nia hateten.
Tuir nia, sidadaun iha kapitál Dili, barak liu mak laiha konxiénsia, bainhira kondus motor laiha kapasete no la monta xapa matríkula, nune’e mós iha sidadaun balun xapa matríkula tau de’it iha motor vagasi laran, bainhira tama iha check point sira foin aprenzenta, ida ne’e razaun ida ne’ebé la klaru,” dehan nia.
Tanba ne’e, mak sira kontinua apela ba sidadaun sira, kuandu xapa matríkula monu lakon laiha tenke trata atu monta ba iha transporte sira, tanba PNTL halo operasaun ne’e sei haree liuliu ba iha xapa matríkula sira ne’ebé laiha.
“Durante ne’e, tuir grafika PNTL Dili nian, sidadaun neebé la uza kapasete konduz transporte hanesan motor barak mak lakon vida iha estrada públiku ne’e atinje too 95%, ida ne’e mak ita husu atu iha konxiénsia tenke uza kapasete atu salva vida no xapa matríkula ne’e atu halo prevensaun ba iha krime organizadu sira iha Dili”, mia informa.
Iha biban ne’e, nia haktuir, grupu organizadu sira barak mak daudaun ne’e eziste iha kapitál Dili, barak uza motor laiha xapa matríkula hodi hadau ema nia sasán no hakanek ema seluk, atu ema seluk labele deteta sira ida ne’e mak durante ne’e akontese.
“Ami halo operasaun mak hetan sidadaun sira hanesan ne’e, ami sei la tolera sira, kuandu la uza kapasete ho la tau xapa matríkula ba transporte sira bainhira halo movimentu iha tempu kalan,” nia hakotu.
585 total views, 3 views today
