DILI (Timor Post)- Polísia Nasionál Timor-Leste (PNTL) Munisípiu Dili, liuhusi Tránzitu Roda Viaria, lalin hotu Karreta aat sira ne’ebé para iha estrada públiku, hodi difikulta movimentu iha Dili laran.
“Ita identifika fatin barak mak sidadaun sira para fali sira-nia karreta iha estrada públiku hanesan tiha fali fatin privadu, ne’e sira kontra Lei kódigu estrada, tanba ne’e Komandu Jerál hatun despaxu hodi ami ezekuta atu foti hotu karreta sira ne’ebé para de’it iha estrada públika tantu karreta at ka di’ak,” dehan Komadante Tránzitu Munisípiu Dili, Inspetór Domingos Gama, iha Bairru Grilhos, Tersa (26/07).
Nia dehan, ohin sira hahú foti ona karreta aat sira ne’ebé durante ne’e para de’it iha estrada públiku iha kapitál Dili, hodi fó livre ba trasporte públiku sira halo movimentu.
Komandante ne’e reforsa, durante ne’e sira la lori tanba difikulta ba Karreta tronton hodi tula, maibé agora sira servisu hamutuk ho Patrimóniu Estadu hodi tula Karreta ne’ebé sira foti.
“Karreta sira ne’e ita lori ba tau iha Komandu Munisípiu Dili, durante loron 90, na’in tenke ba selu multa $120 dolar Amerikanu hodi hasai fali sira-nia karreta, kuandu liu ida ne’e karreta sira ne’e ba hotu ona Patrimóniu Estadu nian,” nia konfesa.
Agora sei halo revista ba Karreta aat ne’ebé sira para de’it iha estrada hodi okupa fatin, kuandu ne’e hotu sei tama ba kada Bairru sira, tanba sidadaun sira barak laiha konsiénsia para fali sira-nia karreta iha eatrada públiku hodi konsidera fatin hansan sira-nia privadu.
Tanba ne’e nia husu ba sidadaun sira tenke iha konxiensia hodi para sira-nia karreta aat sira iha sira-nia fatin privadu, labele tau fali iha estrada públiku.
Enkuantu operasaun ba foti karreta aat sira ne’ebé para iha eatrada públiku ne’e ohin hahú husi Tasi-Tolu, hodi konsege foti karreta rua, no sei kontinua fali iha tuku rua lokraik ne’e.
1,860 total views, 3 views today
Bele hare Video Seluk :