DILI (Timor Post)- Fundasaun Mahein (FM), konsidera Deputadu sira iha Parlamentu Nasionál hamutuk ho Prezidente Repúblika, aprova Lei Kriasaun Organizasaun Investigasaun Kriminál hodi “soran” Polísia Nasionál Investigasaun Kriminál (PNSIK) ho Polísia Sientífiku Investigasaun Kriminál (PSIK).
“FM preokupa Lei ne’e sei la solusiona polémika ka rivalidade entre Polísia Nasionál Timor-Leste liuhusi Servisu Investigasaun Kriminál no Polísia Sientífiku Investigasaun Kriminál, ne’ebé durante ne’e hamosu diskusaun naruk iha sosiedade Timor-Leste,” dehan Diretór Fundasaun Mahein, Abel Amaral, liuhusi Konferénsia Imprensa ne’ebé realiza iha Bairru Grilhos, Segunda (25/07).
Nia dehan, Lei Organizasaun Investigasaun Kriminál ne’e sira haree fó kompeténsia boot liu ba PSIK.
“Lei Organizasaun Investigasaun Kriminál fó kompeténsia boot liubá PSIK no hasai tiha kompeténsia sira ne’ebé durante ezerse husi PNTL iha matéria Investigasaun Kriminál nian, signifika PNTL konsentra de’it ba asuntu sira orden públika no investigasaun kriminál nu’udar kompeténsia PSIK nian hanesan, Korpu Superiór Polísia Kriminál,” deklara nia.
Nia dehan tan, FM preokupa katak PNTL ka públiku bele mai ho presepsaun katak PNTL “inferior” liu PNSIK, tanba PSIK nia natureza hanesan Korpu Superiór Polísia Kriminál no PNTL nia natureza no filozofia Polísia Komunitária hanesan Polísia Orden Públika baibain ida.
“Konsekuénsia husi ida ne’e, rivalidade ka kompetisaun entre PNTL ho PSIK bele kontinua no hamosu ego no arrogánsia institusionál sei fó impaktu ba kooperasaun entre órgaun sira Polísia Kriminál nian no atuasaun sira iha terenu nune’e mós bele provoka konflitu entre instituisaun Estadu sira,” nia preokupa.
Fundasaun Mahein nia observasaun hafoin ezisténsia PSIK iha tinan ida ba kotuk, instituisaun rua ne’e la koopera malu ho di’ak no hadau malu servisu iha terenu. Ho ida ne’e sira husu ba Parlamentu Nasionál no Prezidente Repúblika atu revee fila fali Lei ne’e, maski promulga ona, tanba Lei ne’e la halo diskusaun klaru no la inklui parte relevante hotu hodi halo diskusaun, maibé Parlamentu Nasionál kopy-paste de’it husi Nasaun Portugál nian ho lian portugés, to’o aprezenta ba Prezidente Repúblika hodi halo de’it promulgasaun maibé, seidauk traduz ba tetun hodi ema hotu bele Lee ho komprende molok sira halo aprovasaun.
“Tanba Lei ne’e asesór internasionál iha Ministériu Justisa ka malae sira kopy-paste de’it husi sira-nia rai hodi mai aprezenta ba Parlamentu Nasionál hodi halo debate no haruka ba Prezidente Repúblika promulga no públika iha Jornál da Repúblika, maibé Deputadu sira mós la halo fiskalizasaun iha Timor-Leste entre PNTL no PSIK,” nia hateten.
Tan ne’e FM atu fó hanoin fali katak, Parlamentu Nasionál aprova Lei Organizasaun ba Investigasaun Kriminál ne’e iha loron 14 Juñu 2022, no Prezidente Repúblika promulga iha loron 08 fulan Jullu, depois públika iha Jornál da Repúblika (Lei N.⁰ 9/2022 iha 13 de Jullu).
1,909 total views, 3 views today
Bele hare Video Seluk :