Loron 22/01/2023, Hakerek Na’in: Domingos Maia.
Maluk sira iha Edukasau TL: Halou, imi hotu di’ak hela tokh? Isin dok, maibé fuan besik ba malu nafatin.
Loron hirak ne’e, ita rona eskola nivel ESTV balun atu taka mak:
a) ESTV Rema -Bote (Atsabe); b) ESTV Ramos Horta (Lauana);
c) ESTV Rai- Kala (entre Gololo-Eraulo).
Eskola hirak ne’e ho estado Públiku, hari’i tutuir malu, se la sala, iha tempo ukun Ministério Edukasaun: Sra Dukce no Sr. Kalohan nia tempo no hatuur iha área Posto Administrativo Atsabe no Lete-Foho, Município Ermera.
Problema maka: Eskola hirak ne’e loke no la’o tiha kleur ona, maibé bainhira rona taka fali, barak mak interroga no hakfodak hotu, tanbasá!?!
Deskonfia buat tolu, katak:
a) Karik tan iha relatóriu hosi báse, la konsulta?
b) Fiskalizador hosi nasional?
c) Tan motivu polítiku atu hatún-malu housi kotuk?
Maluk sira: ,, noIha Nasaun doben ida ne’e, maske foin moris, iha tiha ona Lei no Regulamentu sira atu loke Eskola ida. Basá molok atu loke eskola ida, tenke iha uluk estudu iha terrenu, hafoin sosializa fali iha fatin nebé mak atu hari’i eskola ba.
No desizaun ikus tenke mai hosi autoridade leten, mak Ministro Edukasaun, hafoin fihir tiha ona nia kondisaun sira iha báze preparadu hotu ona mak hari’i no inagura.
Maibé atu taka fali, tenke justifika ho razaun ida nebé klaru, konvene no aseitável atu la bele hamosu fali problema dezentendimentu no fó sinal la iha komunikasaun no kordenasaun di’ak ba malu.
Ba povu, eskola sira presiza duni barak atu eduka oan sira, maibé tenke soi nia kualidade naton atu tane oan sira nia kualidade moris, agora no ba futuru.
Maske tenke kompriende mós katak iha kondisaun sira atu sukat kbi’it, bele ka la bele hari’i eskola sira iha fatin nebé de’it; basá hari’i eskola ida, la’ós hanesan hatuur laleo (sarlelon) provizóriu sira iha toos no natar-laran hodi daga bala-fuik sira …
Nune’e, sugere de’it hanoin balun ba responsavel sira iha báze.
Atu bainhira hanoin hari’i eskola ida, tenke fihir uluk kritériu sira ho motivu hirak forte. Ezemplu:
a) Rai ou espasu tenke luan atu hari’i eskola; nia estadu tenke livre hosu Terras no Propriedade.
b) Objetivu tenke klaru atu soi duni povu nia oan sai ema no sidadaun matenek.
c) Apoiu “mão de obra” hosi povu no inan-aman sira hodi sente “ninian”.
d) Halo aproximasaun ba ukun-na’in sira, iha báze no nasional hodi konvense sira atu bele aloka orsamentu ba projetu ida ne’e.
Ho motivo hirak nebé fraku mak:
a) Ho motivu polítiku atu hatudu katak iha nia ukun mak bele halo buat hotu ba povu.
b) Lori ukun ho konfliu interese tan projetu; la’ós tan nesedidade serví povu.
c) Hatudu atitude grupista, partidarista ou ho termu-seluk ekskluzividade: “tan ha’u nian mak tenke fó ba ha’u nian de’it”.
d) Servisu ho báze legal no moral kmok. Inspirasaun polítika no Relijiaun hatudu liuhosi obra karidade ba ema hotu, la foti-liman ho partidu, grupu no instituisaun ida nia naran.
Se haktuir duni pontu hirak leten ne’e no ho lia murak- seluk tan, fiar ba: maske asu-fuik barak hatenu, hakat ba oin ho hakmatek; maske hean- dudu ukun iha tahu dodok- laran, sei dai nia rohan ba; sei senti ksolok espiritual ida nebé la nahas tan hala’o knaar -ukun ne’e ho konsiénsia- moos, iha Maromak futar oin. Amin.
Mai ita aprende.
2,995 total views, 3 views today
Bele hare Video Seluk :
Subscribe to Timorpost
