ADVERTISEMENT

Prezidente Repúblika Kondekora Sidadaun Na’in-39 

Timor Post - Jeral
  • Share

Timor Post (27/11/2020)-Selebrasaun loron deklarasaun independénsia ba dala-45, Prezidente Repúblika Francisco Guterres Lú Olo fó kondekorasaun ho Orden Timor-Leste ba sidadaun nasionál na’in-39 nu’udar rekoñesimentu no valorizasaun Estadu ba asaun patriotizmu, dedikasaun no sakrifísiu ne’ebé hatudu ona iha tempu luta ba ukun rasik-an.

Komunikadu ba imprensa husi Palasiu Prezidensial ne’ebe Timor Post asesu haktuir, Dekretu Prezidente Repúblika númeru 69/2020, 26 novembru, Xefe Estadu rekoñese no valoriza sidadaun nasional ne’ebé sakrifika sira-nia tempu juventude no husik oportunidade atu bá tuir edukasaun formál iha eskola tanaba hakarak liberta rai doben Timor-Leste. Estadu no Nasaun tomak fó rekoñesimentu no valorizasaun, liuhusi kondekorasaun Ordem Timor-Leste, ba knaar importante hirak ne’ebé mak hatudu tiha ona.

Sidadaun nasional sira ne’ebé hetan kondekorasaun “Kolar Orden Timor-Leste” ho titúlu postumu mak Frederico Raimundo da Costa “Bere Malai Laka, Filipe dos Santos “Sakinere”, Pedro Nunes “Sabalae”, Virgílio Freitas “Kalisá” Joaquim Urbano Saldanha “Naha Berek”, Dulce Maria da Cruz “Wewe”, Manuel Soares “Assu Coli”, Amadeu Araújo dos Santos “Mabay Surik”, Miguel da Silva “Sawa”, Pedro Gonçalves Lemos “Teki”.

Prezidente Repúblika fó kondekorasaun “Kolar Ordem Timor-Leste” ba Justo Bernardino da Costa “Lari Mau”, Augusto Araújo “Tara Ablai Anan”.

Sidadaun nasionál sira ne’ebé Estadu fó kondekorasaun “Medalla Orden Timor-Leste” ho títulu postumu mak Clotilde Maria de Fátima “Lou Tik”, Sebastião M. Serpa Ximenes “Laloran”, Mau Caro “305”, Bernardino Xavier “Bermoruk”, Moises Assunção dos Santos “Anak Timur”, Domingos da C. Magalhães “Tilun Tuk”, Venceslau Martins de Carvalho, Melina Madeira “Bi Oan Kiak, Agostinho da Silva “Caina”.

“Medalla Orden Timor-Leste” kondekora ba Pascoal Ximenes Pereira “Nixon”, Virgílio da Costa Mendonça “Tuba Rai”, Sidónio Ximenes “Maunanis”, Mário de Sousa Guterres da Silva “Nunura”, Teófilo de Jesus “La Sudur”, Deolindo da Costa Amaral “Mota Sarai Ran Nakali”, Hermenegildo Gonçalves “Kaer Susar”, António Pinto, Tomás Ximenes Gama “Mau Gadi”, Cesário da Costa “Malcom”, Luisa Amaral “Bikiak”, Inês Rodrigues, Tomás Guterres “Mau Leça”, Raul Soares “Sakudi”, Alberto da Silva “Sera Malik”, Amélio da Costa Xavier “Fatati”, Adelino Nuha Txai “Mau Nuha”, Manuel Gonçalves “La Haluha”

Orden Timor-Leste mosu hosi ho Dekretu-Lei númeru 20/2009, 6 maiu, atu rekoñese sidadaun estranjeiru no nasionál ne’ebé liuhusi atividade profisionál, sosiál ka asaun espotánea nakonu ho korajen, fó ona kontributu boot ba Timor-Leste, ba Timoroan ka ba umanidade.

Iha tinan 2018 Prezidente Repúblika kondekora sidadaun sira ne’ebé mak halo parte iha funu iha Frente Armada. Maioria hosi sira ne’ebé mak hetan kondekorasaun Orden Timor-Leste iha tinan 2018, uluk sira dedika sira-nia an eskluzivamente hodi halo funu iha Frente Armada durante tinan 24 (rua-nulu resin haat) sein iha interupsaun. Iha loron 28 fulan-novembru tinan 2019, Prezidente Repúblika kondekora ba dala ikus, sidadaun sira ne’ebé mak uluk dedika sira-nia an eskluzivamente hodi halo funu iha Frente Armada durante tinan 24 (rua-nulu resin haat) sein iha interupsaun. Kondekorasaun ne’ebé mak dekretadu iha ne’e fó ba Kombatente sira ne’ebé mak uluk halo funu iha Frente Armada ho durasaun entre tinan 20 (rua nulu) to’o tinan 23 (rua nulu resin tolu) no mós ba sira ne’ebé mak mate iha funu laran.

Hosi tinan 2014 to’o tinan 2016, Prezidente Repúblika kondekora grupu sidadaun nasionál sira ne’ebé mak asegura protesaun no ka’er metin segredu kona-ba prezensa líder sira Frente Armada nian ne’ebé mak mai vila laran. Iha tinan 2017 Prezidente Repúblika kondekora mós grupu sidadaun sira ne’ebé mak hala’o knaar nu’udar Estafeta direta no permanente ba líder sira iha Frente Armada. Iha tinan ne’ebé hanesan, kondekora mós sidadaun sira ne’ebé mak hala’o knaar nu’udar enfermeiru ka enfermeira, ne’ebé fó tulun tratamentu saúde ba membru FALINTIL sira ne’ebé mak presiza asisténsia ba sira-nia sáude. (*/cao)

 525 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Prezidente Repúblika Kondekora Sidadaun Na&#821…” A few seconds ago

Lee Mós :
TDD julga suspeito de apedrejamento a viatura e agente da polícia

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No