Timor-Post (12/11/2020)—Prezidente da Repúblika (PR) Francisco Guterres ‘Lu-Olo’ husu hanesan ba Jovemtude hotu-hotu atu hatudu espíritu solidariedade ba malu hanesan ne’ebé hatudu hosi Jovem Amali ba nia maluk Levi iha tempu susar laran.
“Hanesan Prezidente da Repúblika, ha’u haksolok ho joven sira-nia inisiativa oioin, sira-nia determinasaun no dedikasaun atu dezenvolve ita-nia rain. Sira ne’ebé mai husi jerasaun joven, sobrevivente husi masakre 12 Novembru no joven sira ohin loron nian, ne’ebé hatudu sira-nia espíritu solidariedade iha tempu luta, ohin loron hatudu mós sira-nia matenek no dedikasaun atu serve sira-nia maluk joven seluk no ita-nia sosiedade tomak.
Ezemplu ida mak Sérgio Filomeno Marques ka Amali, sobrevivente husi Masakre Sta. Cruz ne’ebé, iha momentu ne’ebá, hatudu ninia aten- barani no solidariedade boot ba ninia maluk joven seluk. Amali ohin loron sai símbolu ida Masakre 12 Novembru nian, tanba iha momentu difisil loos, enkuantu kilat tarutu iha nia sorsorin no foo ameasa ba nia vida rasik, nia lata’uk no la hanoin atu halai, maibé nia tuur ko’us nia maluk joven ida seluk ne’ebé kanek todan, Levi.
Bainhira ita rona iha vídeo ne’ebé belun Max Sthal hasai, Leví hakilar tanba sente moras ho nia kanek sira, no hatudu hanesan nia atu lakon esperansa, Amali fo’o korajen ba Leví, konsola nia katak buat hotu sei di’ak, foo korajen ba Levi atu kontinua persiste. Hanesan fali atu foo mensajen ba Leví labele lakon esperansa tanba Timor-Leste atu ukun rasik an ona! Amali rasik sei iha forsa atu salva nia an, maibé nia deside hela ho Leví maski nia hatene konsekuénsia ne’ebé nia sei simu bainhira militár indonéziu kaer nia. Amali ho Leví sobrevive masakre ida ne’e”, kompara Prezidente da Repúblika hosi nia mensajen ne’ebé hato iha komunikadu ofisial hodi hanoin hikas loron Masakre 12 Novembru.
Xefe Estadu hatutan Tinan 29 liu tiha, Amali la tuur hikar liman haree joven sira no ninia maluk Timoroan sira seluk.
“Ohin loron, Amali kontinua halo servisu hanesan Sekretáriu Jerál Komité 12 Novembru, tau matan no presta servisu ba ninia maluk sobrevivente sira seluk husi 12 Novembru. Se tinan 29 liubá Amali konsege tulun Leví, ohin loron Amali halo servisu atu kontinua halo buat ruma ba maluk sira, sobrevivente sira no mós ba sira ne’ebé mate no sira-nia família. La’ós ida ne’e de’it, Amali ohin loron hala’o knaar nu’udar jestór ba Centru Juventude Bekora. Centro ne’ebé presta servisu importante lubuk ida ba ita-nia joven sira ohin loron hahú husi formasaun ba abilidade moris nian, formasaun língua oioin no komputadór to’o fasilita joven sira hatudu sira-nia talentu no kapasidade iha área oioin” hatutan eis Prezidente Asembleia Konstituinte.
Alende Amali Xefe Estadu mós haktuir Fulan hirak liubá, mídia nasionál balun aprezenta ba públiku joven Luciano dos Santos, ho tinan 26, finalista departamentu Kímika, Universidade Nasionál Timor Lorosa’e (UNTL) nian, ne’ebé husi ninia peskiza akadémika, transforma tasi-been sai bee-moos.
Prezidente akresenta Luciano nia mehi ida ne’e hahú iha UNTL no nia lori filafali ba nia aldeia Raimé, suku Vatuvou, postu administrativu Maubara. Luciano lori tinan 3, hahú husi tinan-2017 to’o tinan-2019 atu konsege realiza duni ninia mehi, liuhusi determinasaun no servisu maka’as hamutuk ho ninia kolega lubuk oan ida.
Iha tinan-2018, Luciano ho ninia maluk joven sira seluk, Olívio no Clotilde Nunes, harii grupu kooperativa ida hanaran Nurak Sulin Hamutuk, ne’ebé kompostu husi ema na’in 8, atu hala’o servisu ida ne’e.
Entre sira na’in 8 ne’e, Luciano ho nia kolega ida de’it mak estuda iha universidade. Iha tinan-2019 mak sira konsege transforma tasi-been sai bee-moos. Luciano ho nia kolega sira konsege realiza ida ne’e ho sira-nia esforsu no rekursu rasik, la hetan tulun husi Estadu ka entidade privadu ruma.
Iha tinan-2020, kooperativa ida ne’e nia membru sai ema na’in 25. Sira transforma tasi-been sai bee-hemu. Ohin loron, sira fornese bee sira ne’e ba kios no loja sira iha Postu Liquiçá no Postu Maubara.
“Prezidente da Repúblika louva no apresia sira-nia kapasidade no vizaun emprendedora nu’udar exemplu di’ak ida ba juventude tomak. Sira-nia moris inspira konfiansa no esperansa ba Timor-Leste”, Xefe Estadu Louva.
Inisiativa ida tán ne’ebé Prezidente mensiona no louva mak inisiativa ida lidera husi sobrevivente ida, husi Masakre Santa Cruz, Nelson Turquel, ne’ebé hamutuk ho joven sira seluk, hamosu grupu ida hanaran Loriku Adventure/Semo Lemo rai. Nelson Turquel, ho joven lubun ida, ho sira-nia organizasaun no suporte rasik, perkorre ho motorizada ita-nia rai-laran tomak, tama to’o área rural remote sira hodi dada-lia ho ita-nia populasaun kona-ba akontesimentu Masakre Santa Cruz no ita-nia luta libertasaun nasionál.
“Iha tinan 2018, ha’u rasik mak entrega ita-nia Bandeira Nasionál ba Lorico Adventure, molok sira hahú sira-nia perkursu ho referénsia espesiál ba 12 de Novembru, ne’ebé sira hanaran ‘Dalan ba Memória’.
Grupu ida ne’e organiza mós eventu sira hanesan ne’e, ba loron importante seluk, hanesan 3 de marsu, ‘Dalan ba Ai-Laran; 20 de Agostu, ‘ Dalan ba Istória’; no 4 de Setembru, ‘ Dalan ba Liberdade’. Alien de eventu ne’ebé relasionadu ho ita-nia istória no ita-nia luta ba libertasaun nasionál, Loriku Adventure/Semo Lemorai iha inisiativa solidariedade importante tebes ba populasaun sira ne’ebé kbiit laek.
Ho osan ne’ebé sira rasik halibur, sira hahú ona harii pré-eskola ida, iha Ersoi/Ermera, iha fatin ida ne’ebé uluk sai abrigu ba Komandante Nino konis Santana. Hafoin Covid-19 sai problema boot ba mundu tomak, inklui ba Timor-Leste, no ita hahú tama iha estadu emerjénsia, grupu ida ne’e fahe hahán no roupa ba uma- kain liu 2000.
Nelson Turquel no joven sira seluk husi Loriku Adventure horisehik hahú ona sira-nia perkursu ho motorizada husi Dili hodi komemora tinan ruanulu resin sia (29) Masakre Santa Cruz nian. Enkuantu ita komemora masakre Dili no selebra Loron Nasionál Juventude iha Dili, sira sai ohin ho motorizada husi Ainaru no sei bá Aileu, Ermera, Liquiçá, Maliana, Suai, Same, Viqueque, Lautém, Baucau no Manatuto no sei filafali mai Dili, iha 21 Novembru.
“Ha’u-nia hako’ak boot ba joven Loriku Adventure hothotu. Parabéns ba imi-nia inisiativa hamoris nafatin ita-nia istória luta no memória ba eroína no erói sira!
Parte seluk Xefe Estadu mós agradese Komisaun Organizadora ba eventu selebrasaun Loron Nasionál Juventude organiza atividades oioin, inklui kompetisaun hakerek no pintura ba foin-sa’e sira. Prezidente Repúblika hein katak, Sekretaria Estadu ba Desportu no Juventude bele halibur hamutuk produtu husi kompetisaun ida ne’e no hato’o ba ema hotu-hotu. Nune’e, bele promove foin-sa’e sira-nia talentu no sira-nia hanoin kona-ba luta ba libertasaun nasionál, juventude sira-nia knaar no valor sira no ispíritu funu nain sira-nian iha kontestu atual no nia aplikasaun ba dezenvolvimentu nasionál. (Jornalista: Julio Salinas)
1,097 total views, 3 views today
Oinsa Ita nia Reaksaun iha Notisia Nee?
You have reacted on “Espíritu Solidariedade husi Amali ba Levi iha M…”
Bele hare Video Seluk :
Subscribe to Timorpost
