ADVERTISEMENT

COVID-19: Iha Santa Kruz, Lú Olo Kontinua Apela ba Sidadaun hotu Kumpri Regra Estadu Emerjénsia

Timor Post - Jeral
  • Share

Timor Post (12/11/2020)—Prezidente Repúblika Francisco Guterres Lú Olo iha nia diskursu ikus iha Selebrasaun Loron Nasionál Juventude, iha Santa Kruz, Dili, kontinua apela ba sidadaun hotu iha rai laran atu kumpri regra estadu emerjénsia hodi nune’e prevene moras da’et COVID-19.

“Atu proteje nafatin ita-nia Povu husi moras Covid-19, ha’u apela ba maluk sira hotu atu tuir regras estadu emerjénsia nian,” Lú Olo subliña.

Lú Olo husu atu ema hotu uza maskara, hadook-an metru ida ho balun, fase liman bebeik ho sabaun.

“Horiuluk hori wain, ita proteje malu nafatin! Fo’o liman ba malu nafatin!,” Xefe Estadu subliña.

Lú Olo rekoñese, mundu tomak ohinloron moris iha inserteza boot nia laran tanba pandemia ne’ebé provoka husi Covid-19. Enkuantu sientista sira halo esforsu boot hodi dezenvolve vasina ida atu trava Covid-19, ema liu millaun ida rihun atus rua mate ona no besik millaun limanulu mak infetadu hela.

“Ita la hatene bainhira loos mak ita bele halakon pandemia ida ne’e,” Lú Olo hatete.

Molok pandemia Covid-19 afeta mundu tomak, iha fulan marsu liubá, Timor Leste hasoru tiha ona resesaun ekonómika.

“Covid-19 halo ita-nia situasaun rai-laran at liután,” nia hatutan.

“Ita-nia populasaun liu 40 % mak moris iha kiak nia laran no família barak moris ho tusan. Ita hotu hatene katak restrisaun husi estadu emerjénsia, hahú iha fulan marsu tinan ida ne’e to’o ohinloron, hamenus maka’as konsumu família sira-nian. Infelismente dezempregu sae problema boot liután ba ita-nia ekonomia. Prezidente Repúblika hato’o nia apresiasaun ba VIII Governo tanba aprova ona medidas ba rekuperasaun ekonómica, no medida balun hahú implementa dadaun ona. Prezidente Repúblika fiar katak medida sira ne’e sei lori impaktu pozitivu,  iha momentu loos, hodi tulun ita-nia sidadaun sira hasoru susar oioin,” Lú Olo subliña.

Tanba ne’e, Lú Olo afirma, ba oin, timoroan tomak tenke servisu hamutuk, ho matenek no laran tomak no moos,  atu rekupera no haburas liután ekonomia rai laran.

“Nune’e de’it mak ita bele dezenvolve ita-nia País hodi garante bein-estar no sustentabilidade ba Povu tomak,” nia dehan.

“Ha’u fiar katak dalan ne’ebé efisiente liu hodi ita prepara futuru ida di’akliu ba ita-nia oan sira mak liuhusi aposta maka’as ba sira-nia edukasaun no saúde, hodi abanbainrua sira bele sai produtivu liu no efikás liu, no bele domina teknolojia foun ne’ebé importante tebes iha kontestu atual,” tenik Lú Olo.

Iha Timor Leste, rejista mós pasiente COVID-19 maibé rekopera hikas.

Iha mundu seidauk iha aimoruk espesífiku ba kura moras ne’e, maibé moras ne’e bele lakon mesak bainhira ema ne’ebé hetan infesaun nia rejisténsia isin di’ak.

Timor Leste deklara ona estadu emerjénsia ba dahitu nu’udar meius prevensaun iha rai laran. (cao)

 874 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “COVID-19: Iha Santa Kruz, Lú Olo Kontinua Apela…” A few seconds ago

Lee Mós :
Don Virgílio Ordena Diákonu Na'in-Haat sai Amu Lulik, "Hau Neon Haksolok, iha Maromak Ha’u mak Soin”

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No