ADVERTISEMENT

PN Presta Minutu Silénsiu ba Trajédia 28 Outubru

Timor Post - Jeral
  • Share

Timor Post (29/10/2020)— Reprezentante Povu Parlamentu Nasionál (PN)  presta minutu silénsiu ba trajédia 28 Outubru 1991 ne’ebé akontese iha Igreja Motaél rezulta juventude loriku asuwa’in Sebastião Gomes mate no  ikus mai hamosu masakre Santa Cruz 12 Novembru 1991.

“Ha’u konvida ita hotu, distintu deputadu sira, mai ita hotu hamutuk fó omenajen no onra ba ita nia Joven asuwa’in Sebastião Gomes. Joven ida ne’ebé brani tebes hodi sara-an  defende lia loos no defende ukun rasik-an. Minutu silénsiu ita hahú”,  dirije Prezidente Parlamentu  Nasionál, Deputadu Aniceto Longuinhos Guterres Lopes, hosi  plenária, kuarta (28/10).

Iha tempu hanesan Deputadu Bankada FRETILIN, David Dias Ximenes “Mandati” rekorda  uluk 28 Outubru 1991, tuku 4 dadersán, Sebastião mate iha Motaél. Ha’u atu fó hanoin ida ne’e, tanba ne’e ha’u minutu silénsiu, para hothotu hanoin hetan ida ne’e.

Nune’e deputadu Marito Mota, nu’udar sobrevivente masakre Santa Cruz 12 Novembru konsidera  loron ida  ne’e importante no haktuir iha tempu ne’ebá joven lubuk boot ida mak iha situasaun ida ne’ebé mak ameasadu no persegisaun halo joven halai ba buka fatin hodi salva-an iha Igreja Motaél.

Xefe Bankada FRETILIN, Francisco Branco, hatete, hosi akontesimentu 28 Outubru 1991 mak determina kazu 12 Novembru 1991.

“Ami sente ida ne’e mós loron istóriku ida, ita presiza rejista, tanba nia determina tebes iha situasaun ida ne’ebé difisil, situasaun ida ne’ebé rezisténsia klandestina sira sente blokeadu iha momentu ida ne’ebá, entaun hamosu asaltu ida ba Igreja Motaél, ne’ebé halo ita nia Joven ida ne’e hetan tiru no mate”, Branco haktuir.

Nune’e Deputadu Bankada CNRT, José Virgílio, haktuir loron ida ne’e importante tebes, tanba Juventude sira see hirus matan ba iha 12 Novembru.

“ Se la iha Sebastião, ne’e mós la iha 12 Novembru. Hakarak fó hanoin hikas ba Joven sira, Sebastião nia mate, sai lisaun ba ita hotu, liuliu ba Joven sira, agora daudauk ukun-an, tenke banati tuir ita nia maun Sebastião nia luta ida ne’e”, Deputadu CNRT ne’e re-afirma.

Deputadu Bankada PLP, Abel Pires, haktuir, loron 28 Outubru realidade duni no loron importante ba Juventude Loriku Asuwa’in, tanba ne’e merese duni fó minutu silénsiu, hodi lembra fila-fali sakrifísiu ne’ebé mak Juventude Loriku Asuwa’in halo ba rai ida ne’e.

“Ohin Deputadu Mota temi kona-ba kampaneru  Julião Mausiri, ha’u lembra fila-fali kona-ba pontu ida ne’ebé mak Deputadu Mandati uluk husu, oinsá mak tratamentu saúde ba kampaneru  Julião Mausiri. Tanba ne’e mak ita tenke haree no tau matan ba ita nia eroi sira ne’e”. Abel dehan.(Jornalista: Julio Salinas Soares)

 632 total views,  6 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “PN Presta Minutu Silénsiu ba Trajédia 28 Outubru” A few seconds ago

Lee Mós :
Mercado de Taibessi não é habitação privada dos negociantes  

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No