Timor Post (08/10/2020)- Deputadu Bankada CNRT, Jose Virgílio deskonfia Vise-Ministru Interior Antonio Armindo autoriza karreta indonézia tama mai Timor-Leste liu hosi Fronteira Terestre.
Liu hosi plenária Parlamentu Nasionál, tersa (06/10), Deputadu dehan hafoin simu informasaun hosi membru PNTL ida mak hato’o informasaun ne’e.
Hatán ba ida ne’e, Vise-Ministru Interior, Antonio Armindo hatete, ba Jornalista sira iha Parlamentu Nasionál, kinta (08/10) katak, ida ne’e laloos, no iha ema ruma mak hakarak hafo’er nia naran, tanba nia parte la hatene karreta ida ne’ebé mak tama mai nia parte seidauk simu informasaun ne’e no lahatene.
“Ha’u atu dehan, informasaun ne’e laloos, ha’u rasik seidauk hatene karreta ida ne’ebé mak tama mai no ita laiha informasaun katak karreta Indonézia ida mai iha ne’e ha’u nunka rona”, responde governante.
Nia mós husu ba deputadu sira hakarak fó sai informasaun sira hanesan ne’e, tenke halo lai investigasaun ruma no tebes ka la’e mak fó sai.
Antonio mós iha momentu hanesan orienta Komisáriu PNTL hodi hare asuntu ida ne’e no orienta mós komisáriu hodi buka to’ok membru PNTL ne’ebé mak fó informasaun ida ne’e ba deputadu Virgílio.
Nia mós husu ba Deputadu Virgílio karik ida ne’e loos, deputadu bele hasoru nia no komisáriu hodi hatudu membru PNTL ida ne’ebé mak fó informasaun ida ne’e atu ne’e bele hatudu faktu.
“Prosesu agora la’o hela no investiga hela karik iha relatóriu investigasaun to’o nia parte sei fó sai fali ba públiku iha tempu hirak tuir mai”, konklui Vise-Ministru.(Jornalista: Jaime Pires)
744 total views, 3 views today
Bele hare Video Seluk :