Timor Post (15/09/2020)—Bankada CNRT walk out iha abertura Terseira Sesaun Lejizlativa husi V Lejislatura Parlamentu Nasionál plenária Parlamentu Nasionál ne’ebé partisipa hosi Prezidente Repúblika Francisco Guterres “Lú-Olo”.
Vise Xefe Bankada CNRT, Deputadu Patrocínio Fernandes, hatete razaun Bankada CNRT sai hosi sala plenária liga ho legalidade meza Parlamentu Nasionál inklui violasaun ba lei sira.
“Ohin ami tama, tanba ami hakarak aproveita atu hato’o kedas ami nia pozisaun ba na’i Prezidente Repúblika atu rona direta saida mak preokupasaun Bankada CNRT nian, liga ho asuntu legalidade ba ita nia país, tanba nasaun demokrátiku, ita presiza harii estadu ida ne’ebé iha lei ninia okos”, informa Patrocínio ba jornalista sira iha PN, tersa (15/09).
Patrocínio relata, estadu ida nee povu tomak sosa ho ruin no ran mak harii, tanba nee CNRT la permite ema ka grupu ida halo tuir ninia gostu ba podér, depois sama hotu lei ne’ebé mak sai hanesan matadalan ba nasaun ida nee. No CNRT kontinua konsidera governu ida nee fotokopia no governu de-faktu.
“Tanba nee mak ami hanoin katak ami la presiza atu tuur iha laran para atu legaliza fali sesaun ida ne’ebé mak ba ami haree katak la iha ninia valor legalidade nian”, afirma Patrocínio.
Patrocínio dehan, solusaun ne’ebé di’ak liu maka hothotu tenke kumpre K-RTDL no lei sira ne’ebé mak vigora iha Timor-Leste, para hodi harii futuru ida ne’ebé mak di’ak liu ba nasaun no jerasaun sira tuir mai. Tanba nasaun nee la’ós para de’it ona ba jerasaun sira agora ne’e.
“Tenke fó valor ba konstituisaun da repúblika ne’ebé lori ema rihun ba rihun ninia ran no ruin mak sosa, no mós lei sira ne’ebé mak estadu gasta osan barabarak para hodi halo lei sira nee para atu kumpre, la’ós gasta osan halo lei para depois la kumpre”. Patrocínio lamenta.
Maibé hatán ba deklarasaun hirak ne’e, Prezidente Repúblika, Francisco Guterres “Lú-Olo” hatete ho hamnasa, atu abandona ou lae, ne’e problema CNRT nian.
“Nee problema sira nian, la’ós Prezidente nian, Prezidente mai iha Parlamentu órgaun soberania ida para atu bele loke sesaun legislativa. Agora abandona ka la abandona, ida nee problema sira nian”, hatete Lú-Olo ho hamnasa.(Jornalista Julio Salinas)
918 total views, 3 views today
Bele hare Video Seluk :
Subscribe to Timorpost
