Timor Post (03/08/2020)-Bankada pozisaun FRETILIN ho KHUNTO diferente opiniaun kona-ba Estadu Emerjénsia (EE) da-haat.
Deputadu Bankada Fretilín, Agostinho Sequeira “Somotxo” hatete Timor-Leste sei presiza halo tan estensaun ba Estadu Emerjénsia (EE), tanba kazu COVID-19 iha nasaun viziñu sira, númeru kontinua aumenta.
“Deklarasaun Estadu Emerjénsia para atu blokeiu ka suspende fronteira, portu no aeroportu Timor-Leste nian, nune’e ema labele tama no sai iha situasaun pandemia ne’e. To’o ohin loron, governu la iha dalan atu suspende ema nia direitu. Tanba ida ne’e mak solusaun ne’ebé governu iha maka tenke liuhusi Estadu Emerjénsia, nune’e bele suspende sidadaun sira direitu no liberdade”, hatete Ministru Defeza Sétimu Governu ba jornalista sira iha PN, segunda (03/08).
Maibe iha fatin hanesan, Deputadu Bankada KHUNTO, Antonio Verdial, hatete nia parte la aseita governu atu aumenta tan Estadu Emerjénsia ba da-haat.
Deputadu ne’e prefere mak governu foku ba vijilánsia iha fronteira, nune’e evita ema labele tama no sai arbiru.
“Hanesan membru parlamentu ne’ebé akompaña situasaun Estadu Emerjénsia ba datoluk, pesoálmente hanesan deputadu ha’u la aseita (la setuju) atu alarga tan Estadu Emerjénsia.
Importante mak oinsá governu mantein pozisaun firme hodi taka ita nia fronteira, atu nune’e ema ne’ebá labele tama mai no ema husi nee labele sai ba. Se karik tama mai, oinsá estadu liuliu governu mak tenke hola responsabilidade hodi atura situasaun sira nee, tuir mandatu ne’ebé mai husi Organizasaun Mundial Saúde,” Verdial pozisiona.
Verdial admite, se karik Estadu Emerjénsia (EE) nee, aplika de’it ba Munisípiu tolu ne’ebé mak iha fronteira, governu tenke define klaru no tenke fó apoiu ba seguransa sira ne’ebé mak destaka iha fronteira, nune’e bele halo serbisu di’ak liután.
“Ida ne’e estratéjia ida ne’ebé mak pertinente hodi trata asuntu iha area fronteira nian”. Verdial subliña.(Jornalista Julio Salinas Soares)
705 total views, 6 views today
Bele hare Video Seluk :
Subscribe to Timorpost
