Timor Post (29/07/2020)-Reprezentante povu iha uma fukun PN, liuhusi Bankada PD, solisita ba oitavu governu kria Komisaun ida hodi foku ba kontrolu no kombate Corona Virus 2019, iha Timor-Leste.
“Bankada PD preokupa tebes ho situasaun polítika ne’ebé ita hasoru dezde 2017, mai to agora. Tanba ne’e, ami nia Bankada propoin, atu governu ne’ebé exelénsia senor primeiru ministru lidera hela, hamosu ona Komisaun ida, hodi konsentra ba estratéjia atu alerta no nafatin vijilánsia ba Prevensaun kontrolu no kombate Corona Virus”, solisita Xefe Bankada PD, Antonio da Conceição, iha ámbitu, avaliasaun no apresiasaun ba relatóriu ligadu ba implementasaun Estadu Emerjénsia hodi prevene propagasaun moras Corona Virus, tersa (28/07).
Deputadu ne’e esplika ezisténsia komisaun tenke iha autoridade no kapasidade, hodi bele tulun governu, hodi hanoin ba estratéjia, atu dezenvolve infraestrutura sira ne’ebé mak nesesita, no mós asegura disponibilidade ekipamentu no medikamentu, hodi kria nu’udar kondisaun, atu bainhira segunda onda (laloran) karik mai, Timor Leste iha ona kondisaun atu bele hasoru.
Iha fatin hanesan, Deputadu Bankada KHUNTO, Luis Roberto, hatete maski Timor-Leste hasoru problema oin-oin durante surtu Covid-19 invade Timor-Leste, maibé Bankada KHUNTO fó apresiasaun ba Primeiru Ministru, ne’ebé nu’udar autór ba Sentru Integradu Jestaun Krize, durante fulan tolu, Timor-Leste bele ultrapasa situasaun Covid-19 iha Timor-Leste.
Alende ne’e Roberto agradese mós Povu tanba hodi kontribuisaun no pasiénsia fó tomak kontribuisaun hodi Timor-Leste ultrapasa moras ida ne’e. (Jornalista: Julio Salinas Soares)
771 total views, 3 views today
Bele hare Video Seluk :