Timor Post (09/07/2020)- Ministru Asuntu Parlamentár no Komunikasaun Sosiál (MAPKOMS) Francisco Jerónimo, iha vizita ba Timor Post hatete governu iha kometimentu servisu hamutuk ho media hodi apoiu fó informasaun la’ós de’it kuantidade maibé kualidade no kredivel.
“Prezensa ha’u nia iha ne’e indiretamente atu hatete ba ita boot sira katak, governu iha kometimentu atu iha kooperasaun nafatin ho media sira, hakarak oinsá hamutuk ho media sira dezenvolve, atu hamosu informasaun sira ne’ebé mak la’ós kuantidade de’it maibé informasaun ne’ebé mak iha kualidade no kredivel”, hatete Ministru Francisco, hafoin rona ‘halerik’ hosi Diretora Santina de Araújo iha salaun Timor.
Eis deputadu adianta kooperasaun maka buka fó solusaun ba problema sira ne’ebé instituisaun no jornalista sira hasoru.
“Kona-ba ita boot sira nia situasaun hanesan ohin diretora hatete, sim ha’u atu hatete ba ita boot sira katak, prezensa iha ne’e atu koopera ho imi no servisu hamutuk ho imi hodi buka dalan atu fó solusaun ba problema sira ne’ebé mak ita boot sira hasoru”, tenik atuál Prezidente Federasaun Futeból Timor-Leste (FFTL) ne’e.
Antes, Diretora Timor Post (TP), Santina da Costa Araújo, introdús Kompañia Timor Post hari hosi ema na’in (14) hosi munisípiu (11) iha loron 29 fulan Fevereiru tinan 2000. Timor Post nia motto Hari Unidade Justisa no Demokrasia, nia misaun mak halo kontrolu sosiál diverte sidadaun, habelar informasaun no edukasaun populasaun liu hosi publikasaun jornál loron-loron.
Timor Post fó servisu ba timoroan hamutuk (62) kada loron jornál TP sempre produs ejemplar maibé depois akontese impase polítika no estadu emerjénsia covid-19 entaun impaktu boot ba rendimentu no kliente barak maka para entaun agora produz de’it rihun ida resin.
Diretora ezekutivu fundasaun Timor Beran ne’e rekomenda ba Ministru atu hato’o ba konsellu ministru reativa hikas jornais sira ne’ebé hapara iha instituisaun públiku sira.(Jornalista: Jaime Pires)
581 total views, 3 views today
Bele hare Video Seluk :