Timor Post (22/06/2020)- Polisia Nasionál Timor Leste (PNTL) komandu Munisípiu Dili, detein suspeitu na’in 16 estudante no, identifika joven lokál no família matebian na’in 5, harii postu seguransa relasiona ho kazu domingu (21/06) madrugada ne’ebé rezulta joven HMF ho idade 21 mate iha kanpus UNPAZ.
“Prosesu investigasaun la’o detein ona ema hamutuk 16 ho identidade hanesan, RJCP, JRA, ESDJ, CDAG, FC, DI, ABFT, HNA, AMU, NM, LDSDJ, JPJ, AJP, JSJ, JCM no FAL prosesu ba investigasaun, no sira ne’e mai hosi estudante estajiáriu. Ita mós halo ona identifikasaun ba juventude lokál hamutuk ho matebian ne’e mai iha fatin akontesimentu Nain 5 mak inisiál, MF, JF, FM, ACE no MN”, hatete Superintendente Xefe Armando Monteiro ba Jornalista sira iha Kaikoli, segunda (22/06) .
Armando haktuir hosi rezultadu investigasaun kazu ne’e mosu iha atividade estaziadu ida halo iha UNPZ no, matebian partisipa iha atividade ida ne’e, la espera iha madrugada akontesimentu ida tantu hosi universitáriu no komunidade iha ne’ebá rezulta ita nia joven ida ho identidade HMF, idade 21 mate no rezulta mós estudante na’in 6 kanek.
Armando hatete akontesimentu ne’e normaliza kedas hosi PNTL hodi evakua vítima kanek na’in 6 ba halo tratamentu no matebian, Forensik evakua ba sala mortuariu HNGV, PNTL mós rekolla evidénsia iha motorizada ida tantu mós alkol no sasán sira seluk hanesan martelu no besi kanu.
Armando afirma polisia mós sei halo investigasaun kle’an ba família ho reitór UNPAZ tanba fó sai kronolojia la hanesan.
“ Família dehan estudante sira mak baku mate maka soe tun, reitór dehan, nia halai mak monu rasik. Maibé agora prosesu investigasaun sei la’o hela no PNTL sei esforsu liu hosi finalidade investigasaun mak bele deskobre motivu hosi akontesimentu” hateten Armando.
Molok hakotu Komandante Munisípiu Dili ne’e informa polisia mós tau ona postu ida iha lokál akontesimentu hodi halo seguransa ba fatin refere no mós ba estudante estajiáriu sira hotu.
(Jornalista: Jaime Pires)
968 total views, 3 views today
Bele hare Video Seluk :