Timor Post (12/06/2020)—Iha loron Kuarta foin lalais ne’e Komisaun Anti Korrupsaun (KAK) halo investigasaun ba Xefe Suku Labarai Mousinho Amaral, tanba identifika katak joven balu seidauk forma uma kain maibé hetan direitu ba subsídiu Covid-19.
“Informasaun ne’ebé tama iha KAK depois KAK to’o kedas iha fatin pagamentu hodi halolo kedas informasaun mai ami no parte Munisípiu mós husu mai ami atu identifika lai ema ne’e, tanba ne’e mak pagamentu ba ema ne’e sei pendente hela”, informa Xefe Suku Labarai ba Timor Post.
Xefe Suku iha postu Suai Villa Munisípiu Covalima ne’e rekoñese ema ne’ebé KAK deskonfia ne’e ninia alin rasik, maibé nia alin ne’e harii ona uma kain.
“Ha’u nia alin rasik maibé nia forma ona uma kain, agora ninia ferik oan ho moras surtu Covid-19 ne’e mak to’o ohin loron seidauk fila mai hamutuk ho nia ho oan iha Timor tanba nia sei iha hela Indonézia ne’ebá. Sira na’in rua hola malu ona, tanba lori malu ba mai hodi aprenzenta ba família feto nian no mós mane nian maski uma rua sei dauk tur hamutuk”, esplika Mousinho.
Alende ne’e Xefe Suku refere informa iha benefisiáriu ida tan ne’ebé ninia pagametnu sei pendente tanba númeru kartaun la hanesan.
“Ema ne’e ninia númeru kartaun eleitorál original ho númeru eleitorál ne’ebé sai iha lista pagamentu ne’e mak la han malu ida ne’e mak agora sei halo pendente hodi halo reklamasaun”, nia hatutan.
Xefe Kamanasa Garante Komunidade Naran Laiha sei hetan Hotu Subsidiu
Iha fatin seluk Xefe Suku Kamanasa, Samuel Barros, garantia komunidade sira ne’ebé naran família la tama iha lista pagamentu subsidiu $100 kuaze uma kain 10 resin sei hetan hotu subsídiu.
“Ita garante uma kain 10 ne’ebé naran la tama iha lista ne’e sei hetan hotu subsídiu ne’e” Samuel garantia iha entrevista ho Timor Post iha nia knar fatin sede Suku Kamanasa Postu Administrativu suai, munisipiu Kovalima.
Nia hatutan lider komunitaria sei serbisu hamutuk ho xefe aldeia no ekipa hosi nasionál atu resolve molok loron 15 nia laran.
“Ami sei esforsu, la hatene tanba keta iha failansu tékniku karik, tanba ne’e ami buka meius atu hadi’a para sira bele hetan hotu subsídiu ida ne’e” tenik Samuel.
Lider komunitariu ne’e subliña durante pagamentu ba subsídiu Covid-19 hahú hosi inisiu mai to’o ohin loron iha Kamanasa laiha failansu tanba entre xefe Suku, xefe aldeia, konsellu suku no ekipa hosi nasionál inklui ofisial polisia Suku no komunidade la’o di’ak.
Jornalista: Julio Salinas Soares
Editor: Mariano Martins
1,262 total views, 3 views today
Bele hare Video Seluk :