Timor Post (12 Juñu 2020) – Prezidente Komisaun Parlamentu Nasionál, Maria Angelica informa katak Governu iha kuarta (10/06) hato’o tan pedidu levantamentu urjénsia osan $ 286.800.000,00 (Dolar millaun atus rua ualunulu resin neen, rihun atus ualu) husi fundu petrolíferu atu sustenta servisu mákina estadu nian.
Tuir Prezidente Komisaun Asuntu Finansas Públiku ne’e, Governu husu tan PN atu autoriza aloka fundu Petrolia ho montante refere hodi haforsa kofre estadu no mós balu atu finansia COVID-19 nian.
“Sira (Governu-red) nia pedidu karakter urjénsia nee balun finansia kofre estadu ba duodecimo, balun sei ba finansia covid-19”, hatete Angelica Rangel ba Jornalista iha Uma Fukun PN.
Deputada Bankada FRETILIN ne’e hatete iha pedidu refere Governu la sita alokasaun osan montante hira-hirak, husu de’it levantamentu fundu petrolíferu millaun $ 286.8 para fó Governu sustenta servisu mákina estadu liuhosi duodecimo ho rezolve situasaun atuál sira iha rai laran.
Nia informa Komisaun C sidauk eskreve alokasaun osan ba saida de’it, tanba ne’e sei husu Governu mai atu esplika ba Komisaun antes lori ba plenáriu PN hodi halo diskusaun.
Nia afirma, karakter pedidu governu atu halo levantamentu ba fundu petrolíferu ho durasaun 24 oras karakter urjénsia, maibé kinta horisehik feriadu, komisaun C sei halo servisu iha sesta ohin ba pedidu refere bele konklui iha segunda feira oin tuir rejimentu PN artigu 97. (flo)
717 total views, 3 views today
Bele hare Video Seluk :