Timor Post (10/06/2020)-Timoroan na’in ida autoridade Indonézia entrega hikas (deporta) ba médiku sira ne’ebé responsabiliza iha area Mota-Masin Salele, Tilomar, Munisípiu Covalima, hafoin detein no hatama iha Sela Atambua iha loron 21 Maiu liubá.
Simu tiha sidadaun ne’e, responsavel médiku iha area refere, Humberto Yohanes, deklara rezultadu screening la deteta timoroan nee iha sintoma COVID-19, tanba iha Atanbua la halo movimentu ba mai
“Ohin ita iha Kovalima liuliu iha Postu entrada Mota Masin Salele simu ita nia sidadaun Nelson Mandela hafoin governu Indonézia deporta mai. Nia to’o mai iha postu entrada Salele Mota Masin mediku halo kedas screening ba ninia sintoma no husu nia istória viajen maibé sidadaun refere lá hetan sintoma relasaun ho Covid-19”, Humberto informa ba Timor Post online (TPO) iha Salele Mota Masin.
“Nia iha ne’ebá la halo movimentu ba mai nia hela iha fatin de’it tanba bainhira nia to’o iha Atanbua polisia detein iha sela polisia no ohin sira deporta fali nia mai fali Kovalima”, hatutan Humberto.
Sidadaun refere ho naran inisiál NM, estatutu nu’udar estudante idade 22 hela rasik iha Munisípiu Kovalima.
Tuir informasaun TPO simu iha terenu katak, NM ba Atambua liu hosi dalan legal. Informasaun seluk ne’ebé fosai katak, kuarta semana oin, parte Indonézia sei deporta tan sidadaun Timor oan na’in 4 liu hosi Postu Mota Masin Salele-Kovalima.
Jornalista: Julio Salinas Soares
Editor: Mariano Martins
715 total views, 3 views today
Bele hare Video Seluk :
Subscribe to Timorpost
