DILI—Advogadu privadu sira kompostu husi Manuél Tilman, Miguel Faria ho Júlio Bobo preparadu lori hikas ba Tribunál Rekursu, petisaun hasoru desizaun sira Prezidente Repúblika Francisco Guterres Lú Olo nian liga ho situasaun polítika rai laran.
Advogadu Miguél Faria ba Timor Post via telefone Sesta (15/05/2020) hatete, bazeia ba notifikasaun husi Tribunál Rekursu ba Advogadu sira katak, iha loron 10 nia laran bainhira prienxe ona rekejitu sira maka bele prosesa hikas petisaun ne’e. Tanba ne’e, nia parte preparadu tiha ona no tuir planu sei lori ba Tribunál Rekursu iha loron Sesta lorokraik ka Segunda (18/05/2020).
“Ami prepara hela dokumentu hotu, asinatura no junta hotu dokumentu relevante sira relasiona ho regra sira,” Advogadu Miguél haktuir.
Deputadu sira ne’ebé asina petisaun ne’e liu 1/5.
Iha prosesu daruak ne’e, Advogadu sira sei halo mós justifikasaun ba Tribunál Rekursu katak, asaun rekerente sira nian ne’e asaun sivíl, iha ne’ebé la presiza hetan aprovasaun 2/3 iha Parlamentu Nasionál tanba la’ós asaun krime.
“Importante liu iha prosesu ne’e maka Tribunál Rekursu halo verifikasaun ba faktus sira. Ita la’ós akuja ita nia prezidente maibé ita husu ba Tribunál Rekursu atu fiskaliza abtratamente ba desizaun Prezidente Repúblika nian iha anterior,” Advogadu Miguél subliña.
Entretantu Prezidente Tribunál Rekursu Deolindo dos Santos hatete, nia parte kontinua hein prosesu ne’e iha Tribunál Rekursu no trata tuir lei no regra sira ne’ebé iha.
Deolindo dehan, desizaun ne’ebé nia parte hasai iha loron 11/05/2020 ba petisaun inisiál ne’e la’ós haree ba méritu maibé haree ba prosesuál.
“Ami la haree ba méritu maibé iha kestaun prosesual de’it. Mais nuentantu kestaun méritu ne’ebé iha ne’eba ita boot sira (jornalista) bele ba lee fali, ha’u labele esplika tanba seidaun to’o méritu,” Deolindo subliña hafoin reuniaun semanal ho Prezidente Repúblika Francisco Guterres Lú Olo, iha loron Kinta (14/05/2020), iha Palásiu Prezidensiál, Bairro-Pité, Dili.
Iha loron 11/05/2020, Tribunál Rekursu liuhusi juis na’in tolu, Deolindo dos Santos, Maria Natérsia Gusmão no Jacinta Correia da Costa, indefere petisaun dahuluk husi deputadu sira hamutuk na’in-18 ne’ebé Advogadu na’in-tolu prosesa.
Rajaun husi indefere (la atende) petisaun ne’e tanba liga ho rajaun sira iha petisaun ne’e kona-ba violasaun klara i grave ne’e obrigasaun konstitusionál maibé tenke liuhusi Parlamentu Nasionál hodi hetan apresiasaun husi membru deputadu 2/3.
Maske nune’e, liuhusi konferénsia ba imprensa iha loron Kinta (30/04/2020),, Prezidente CNRT, Kayrala Xanana Gusmão akompaña husi advogadu sira hatete, petisaun inisiál ba Tribunál Rekursu atu husu fiskalizasaun ba Tribunál Rekursu atu deklara katak iha duni violasaun klara ka la’e prinsípiu konstitusionais, liuliu liga ho desizaun la fó posse ba membru governu sira husi CNRT no prosesu sira to’o indizitasaun Primeiru Ministru ba governu dasia ne’ebé prezidente repúblika nonok tiha de’it iha dalan klaran.
Xanana afirma, atu defende lia loos no kaer metin nafatin estadu direitu demokrátiku maka prosesu ba tribunál rekusru.
“CNRT buka atu hatudu responsabilidade ba nasaun. Ita iha hela krize institusional,” Xanana hatete. (cao)
727 total views, 3 views today
Bele hare Video Seluk :
Subscribe to Timorpost
