DILI—Suspeitu ba pesti coronavirus (COVID-19) sa’e husi 236 ba 314 iha loron 18/04/2020. Husi númeru ne’e na’in 195 hetan rejultadu teste negativu, na’in 97 laboratórium seidauk fó sai rejultadu, na’in 18 pozetivu inklui ida ne’ebé rekopera no provavel na’in haat.
“To’o ohin loron ita halo ona teste ba ema hamutuk 314, ita kompara ho horiseik (17/04/2020) halo teste 236. Ne’e quer dizer que teste adisional 78. Ne’e tanba (SIJK) foti desizaun teste ema hotu iha kuarentena (kuarentena sira ne’ebé ema pozetivu sira hela ba),” Porta Vóz Sentru Integradu Jestaun Krize (SIJK), Doutór Sérgio Lobo ba Jornalista sira iha Sala de Situasaun, Sábadu (18/04/2020).
Doutór Sérgio dehan, antes ne’e mós rejultadu teste ba ema na’in 19 mak seidauk fó sai. Nune’e, nia esplika, ho aumentu ema na’in 78, sura hamutuk ema na’in 97 mak seidauk hatene rejultadu pozetivu ka negativu.
Entretantu Doutór Sérgio informa, totál ema ne’ebé sei iha kuarentena sira iha Dili laran ho munisípiu sira hamutuk ema na’in 607.
Kona-ba ema na’in hira mak iha hela sala izolamentu Vera Kruz, iha loron 17/04/2020, Porta-Vóz SIJK, Doutór Rui Maria de Araújo informa, ema na’in 17 ne’ebé pozetivu COVID-19 ho ema na’in haat ne’ebé tama iha kazu provavel.
“Sira konfirmadu/pozetivu ne’e hela ketak, sira ne’ebé provavel ne’e ketak iha fatin seluk,” Doutór Rui klarifika.
Kona-ba kazu provavel, Doutór Rui esplika, kazu ne’ebé rejultadu laboratórium seidauk konfirma. Ou tuir Organizasaun Saúde Mundiál (OMS) konsidera kazu provavel ne’e interminadu. Ka seidauk bele determina konfirmadu ka la’e, ou ema ne’ebé tanba situasaun la permite seidauk bele halo ezame laboratórium ho PCR. (cao)
600 total views, 3 views today
Bele hare Video Seluk :
Subscribe to Timorpost
