DILI—Primeiru Ministru Taur Matan Ruak informa, Sentru Integradu Jestaun Krize (SIJK) konklui senáriu ultrapesimista ba hasoru atake virus corona (COVID-19) bele hamate ema hamutuk rihun 17 iha Timor Leste.
Taur fó sai kestaun ne’e iha nia intervensaun iha Uma Fukun Parlamentu Nasionál, Kinta (16/04/2020) iha sesaun extraordinára ba governu hato’o relatóriu kona-ba aplikasaun estadu emerjénsia durante loron 19 hafoin Prezidente Repúblika Francisco Guterres Lú Olo dekreta iha loron 28/03/2020.
Taur esplika, hanesan líder ba SIJK orienta halo senáriu rua kompostu husi senáriu otimista no senáriu ultrapesimista.
Nune’e, nia haktuir, senáriu dahuluk governu halo esforsu tomak atu ema labele mate, maibé Timor Leste rejista ona kazu ualu, ida rekopera no seluk atualmente iha hela sala izolamentu Vera Kruz.
Ho nune’e, Taur haktuir, SIJK konklui senáriu ultrapesimista ho análiza katak, Timor bele sofre infetadu rihun 390 katak pursentu 30 husi total populasaun.
Husi númeru ne’e, Taur klarifika, kazu lizeirus rihun 156, kazu grave rihun 58, sira ne’ebé grave maibé hetan asisténsia husi ventilasaun asistida rihun 1950, no mate rihun 17.
“Mas ne’e senáriu ultrapesimista. Tanba ha’u hanesan líder ba sentru ida ne’e (SIJK) orienta sira para haree liu senáriu pior (otimista). I senáriu ultrapior (senáriu ultrapesimista) mak ida ne’e,” Taur salienta.
Xefe Governu ne’e hatutan, senáriu ultrapesimista ne’e konklui tanba haree ba sistema saúde iha Timor Leste iha difikuldade boot.
“Nasaun sira ne’ebé ke konsidera sira nia sistema saúde di’ak liu iha mundu laiha kapasidade, la’ós Timor mak iha kondisoens para atu sustenta,” Taur dehan.
Maske nune’e, nia hatete, governu kombina buat rua maka vontade ho kapasidade.
“Ita uluk iha funu, ita laiha kapasidade mas vontade mak kapas liu, ita lakon rihun atus rua mak ita manan. Ohin ha’u la presiza hanoin katak vontade mak boot liu fali kapasidade. Kapasidade ho vontade tenke hanesan,” Taur subliña.
Entretantu Timor Leste rejista ona kazu hamutuk ualu. Inklui pasiente pozetivu ida rekopera ona nu’udar sidadaun estranjeiru (kazu importadu) no timoroan na’in hitu (kazu importadu) atualmente asegura hela iha sala izolamentu Sentru Saúde Vera Kruz, Dili. (cao)
579 total views, 3 views today
Bele hare Video Seluk :
Subscribe to Timorpost
