DILI—Polísia Nasionál Timor Leste (PNTL) liuhusi Servisu Investigasaun Kriminál Nasionál (SIKN) hasai sidadaun Indonézia ida ne’ebé klandestinamente tama husi fronteira terrestre no subar iha Kuarentena ida iha Farol, Dili.
Joven ne’e nia aman husi Postu Administrativu Venilale Munisípiu Baucau no nia inan husi Atambua. Nia hili ona sai sidadaun Indonézia.
Kinta (16/04/2020), SIKN akompaña husi Komando Polísia Munisípiu Dili ba hasai timoroan ne’ebé sai ona sidadaun Indonézia ne’e tanba deteta nia komete krime iha Provísia Nusa Tenggara Timur (NTT)-Indonézia, tama ona kadeia maibé nia halai sai no halai mai Timor Leste.
Komandante PNTL, Munisípiu Dili, Armando Monteiro informa, sidadaun ne’e tama iha Dili iha loron Tersa (14/04/2020), no tula sai ona husi Dili tuku 10:40 ba fronteira hodi entrega ba autoridade sira iha NTT.
“Nia (timoroan) hili ona sai sidadaun Indonézia, nia komete aktu krime iha ne’eba. No tuir informasaun ne’ebé Komando Munisípiu Dili katak nia halai sai husi sela detensaun iha dia 13,” Komandante Armando haktuir ba Jornalista sira iha terrenu.
Durante loron hirak sidadaun ne’e hela iha kuarentena, iha duni família sira tenta ba halo vizita maibé tanba polísia hatene antes ona estatutu husi sidadaun ne’e maka polísia la fó autorizasaun ba família sira ba hasoru nia.
“Ami la autoriza tanba. Ita nia dever hanesan sidadania, se buat ruma la loos bainhira nia sei iha ne’e família la infomra, maibé nia hili tiha sidadania rai seluk maka ita mai reklama dehan ita aman ba oan ne’e. Entaun ita mak subar, ita la onestu ba ita nia a’an no ba ita nia estadu, autoridade lokal sira,” KOmandante Armando hatete. (res/cao)
526 total views, 6 views today
Bele hare Video Seluk :