DILI—Ekipa husi Laboratórium Nasionál iha loron Tersa (14/04/2020) hafoin Doutór Daniel Murphy hakotu iis liu oras ida aranka kedas ba foti amostra husi matebian hodi ba halo teste relasiona ho moras da’et corona alias COVID-19.
Jestór Kinika Bairro-Pité (KBP), Inácio dos Santos ba Jornalista sira, Kuarta (15/04/2020) haktuir, nia rasik maka halo kontaktu ba Laboratórium Nasionál hodi hala’o asaun ne’e atu hatene lolo’os tanba Doutór Daniel durante ne’e konsulta ema barak.
“Tanba agora surtu ne’ebe mak akontese, entaun ita antisipa para labele akontese, entaun ha’u kontaktu ba sira Laboratórium Nasionál, para bele halo teste ba doutor nia sample, para bele hatene. Tanba durante ne’e doutor mos konsluta ema barak loos, ita la hatene doutor konsulta ema sira ne’e pozitivu ka negativu, tanba loron ida doutor bele hare ema atus ida,” Jestór KBP Inacio dos Santos, ba jornalista sira iha KBP, Bairru Pite, kuarta (15/04)
Inacio espera rejultadu teste ba amostra husi Doutór Daniel nian negativu ba COVID-19.
“Se doutor la afeta ba moras ida ne’e graças a deus, se afeita tenke-ser halo atendomentu lalais para bele salva ema sira ne’ebé mak besik ka kontaktu ho doutor,” Inácio subliña.
Inácio informa, hafoin kontaktu ba Laboratórium Nasionál, iha duni ekipa ida kompostu husi ema na’in haat mak ba foti kedas amostra husi Doutór Daniel.
“Korikalan ha’u dehan kedas katak, bainhira tuku 10 hanesan nee, ita boot sira tenke fo hatene ona rezultadu mai ami para ami bele hatene. No ha’u fiar katak, orsida ha’u kontaktu ho sira, sira bele fo rezultadu pozitivu ka negativu,” Inácio dehan.
Doutor Daniel Murphy nu’udar fundador ba Klínika Bairro-Pité, hakotu ona iis iha loron Tersa (14/04/2020) iha nia nia rejidénsia Praia dos Coqueros, Dili, iha oras tuku 20:30, tanba hetan moras fuan (ataque cardiaco).
Doutor Daniel nu’udar sidadaun amerikanu ne’ebé hala’o misaun iha Timor Leste liu tinan 20.
Prezidente Parlamentu Nasionál Arão Noe ba Timor Post hatete, rona notísia ne’e sente triste tebes tanba Timor Leste lakon doutor ida ke nunka kole halo atendimentu ba pasiente sira ho di’ak no ho responsabilidade.
“Ema barak inklui ha’u deve nia favor barak liu husi tratamentu iha klínika ninian ne’e,” Arão hatete.
Arão subliña, Doutór Daniel merese Estadu Timor Leste fó omenajen no kondekora nia tanba serví povu Timor Leste iha nia klínika ne’e to’o mate.
“Ninia kontribuisaun durante tinan naruk liu husi klínika ne’e,” Arão salienta.
Klínika Bairo koñesidu mós ho naran Klínika Lanud harii husi Doutor Dan Murphy iha tinan-1999 hodi fó tratamentu saùde ba pasiente sira ho gratuita. Loron-loron Klínika Bairo Pite fó tratamentu saúde ba maternidade no labarik sira, vasinasaun, tuberculosis, malaria, denge, tratamentu no diagnoza HIV, nehan, promosaun saúde, formasaun ba pesoál saúde. Klínika ne’e iha laboratóriu no farmasia hodi fó asisténsia ba nesesidade pasiente sira-nian. (jry/cao)
684 total views, 3 views today
Bele hare Video Seluk :
Subscribe to Timorpost
