DILI—Iha loron Tersa (14/04/2020) liu tuku sia dader ekipa médiku evakua tan ema na’in rua sai husi Hotel Katuas ba fatin izolamentu iha Sentru Saúde Vera Kruz, Dili. Sura ho pasiente pozetivu COVID-19 na’in tolu, hamutuk na’in lima.
Parte saúde toma medida ne’e tanba ema na’in rua ne’ebé hahú Segunda (13/04/2020) tama iha observasaun médiku sira nian identifika síntoma COVID-19.
Tuir observasaun Jornalista Timor Post iha terrenu haktuir ekipa médiku sira halo intervensaun rápidu tebes.
Entretantu teste ba amostra husi ema na’in rua ne’e hamutuk ho sira na’in 53 seluk sei fó sai pozetivu ka negativu ba moras da’et corona alias COVID-19 husi Sentru Integradu Jestaun Krize (SIJK) iha oras tuku 15:30 iha Sentru konvensaun Dili (CCD).
Ema na’in tolu ne’ebé rejista ona hanesan pasiente pozetivu ba COVID-19 mai hotu husi fatin kuarentena Hotel Katuas. Dahuluk estudante feto ida tama iha izolamentu iha loron 10/04/2020, no na’in rua seluk tama iha loron 12/04/2020.
Provizoriamente Timor Leste rejista kazu COVID-19 hamutuk ema na’in haat inklui sidadaun estranjeiru ne’ebé rekopera no alta ona husi sala izolamentu iha loron 10/04/2020.
Entretantu okupante sira iha kuarentena Hotel Katuas hala’o viajen hamutuk ho karreta bis ida husi Batugade ba Dili iha loron 1/04/2020 inklui na’in rua ne’ebé foin evakua ba Sentru Saúde Vera Kruz.
Porta-Vóz Servisu Intergradu Jestaun Krize (SIJK), Odete Maria Viegas haktuir, timoroan na’in ualu mak halo viajen husi Kupang mai Batugade, sira na’in ualu iha Travel ida. No husi Batugade to’o iha Dili sira sa’e Bis Maliana nian. Iha Bis laran ne’e hamutuk ema na’in 25, ne’e la inklui kondutor ho ajudante rua. (cao)
1,549 total views, 6 views today
Bele hare Video Seluk :