DILI—Partidu FRETILIN ho PLP rekoñese la prienxe maioria parlamentar tanba sura partidu rua nia kadeira iha Parlamentu Nasionál hamutuk 31 de’it, maibé defende atu iha governu ne’ebé de’it tenke iha estabilidade governativa.
Sekretáriu Jerál FRETILIN, Marí Bim Amude Alkatiri afirma, partidu FRETILIN ho PLP sei hetan lejitimidade husi urnas tanba defende estabilidade governativa.
“Partidu rua ne’e hamutuk 31 kadeiras ona, i ha’u fi’ar tanba iha intensaun atu uza lejitimidade ke mai husi urnas, partidu mais votadu FRETILIN deside hamutuk ho PLP atu hahú prosesu ne’e,” Alkatiri subliña iha okajiaun asina plataforma intendimentu entre FRETILIN ho PLP iha Salaun Hotel Timor, Dili, Sábadu (21/03/2020).
“Jenerál Taur Matan Ruak ho ha’u rasik asina deklarasaun ida la’ós para halo aliansa foun, (maibé) atu difini plataforma intendimentu ida, atu loke a’an ba halibur ema hotu-hotu iha rai ida ne’e, atu luta kontra corona virus, i atu hamutuk manan impase polítiku ida ne’e,” Alkatiri hatutan.
Alkatiri dehan, Timor Leste kuaje tinan tolu impase tanba governu minoritáriu dehan la sustentavel, maibé mós governu maioritariu mós laiha sustentabilidade governativa. “Signifika ita presiza hanoin didi’ak bainhira iha governu ida esklui sira seluk maka laiha nafatin sustentabilidade,” Alkatiri salienta.
Nia hatutan tan, bainhira iha governu ida inklui forsa polítiku hotu liuliu ba sira ne’ebé hakarak maka bele iha sustentabilidade.
“Tanba ne’e ha’u fi’ar FRETILIN ho PLP hahú de’it ho 31 votus, maibé sé aban bairua forma duni governu dasia, programa no orsamentu sei liu. Tanba partidu sira iha parlamentu no povu tomak mós kole ona ho impase polítiku,” Alkatiri hatete.
Alkatiri dehan, sé de’it mak ba kaer ukun tenke hanoin uluk povu nia vida. Tanba ne’e, nia dehan, iha intendimentu ida ne’e la kontra natura no laiha kontradisaun intereses maibé iha de’it interese komum atu serví povu.
Alkatiri afirma, laiha dalan ba eleisaun antesipada tanba Timor Leste agora tama hela iha situasaun emerjénsia liuliu atake virus corona.
Iha eventu istóriku ida ne’e líder partidu polítiku Alkatiri ho Taur ho partisipante sira uza hotu maskra nu’udar meius prevensaun ba virus corona ne’ebé Timor Leste rejista ona kazu ida husi sidadaun estranjeiru ne’ebé ministériu saúde deklara ona iha loron hanesan.
Entretantu Alkatiri hatete, sei asegura nafatin Primeiru Ministru (PM), Taur Matan Ruak, to’o 2023 maibé prontu simu desizaun bainhira Prezidente Repúblika (PR), Francisco Guterres ‘Lú Olo’ pronunsia.
“Ha’u la dehan FRETILIN mak atu lidera Governu. Ha’u dehan FRETILIN sei apoia nafatin Primeiru-Ministru, Taur Matan Ruak, iha VIII Governu Konstitusionál to’o 2023. Tanba, FRETILIN nia estratéjia serbisu nafatin atu manan eleisaun iha 2023. Maibé tempu agora susar ne’e, FRETILIN hanoin katak estabilidade governativa ita tenke garante, la’ós muda governu mak iha estabilidade governativa. Fó apoia ba sé mak ukun agora, ne’e atu lori kultura polítika foun mai ita-nia rain,” Alkatiri hatete.
Alkatiri afirma, la’ós hatún Governu tanba hakarak podér maibé tenke ajuda Governu halo serbí di’ak liu povu ida-ne’e, ne’e mak FRETILIN hakarak. FRETILIN preokupa ho vida povu nian tanba ne’e sei apoia tomak ba Primeiru-Ministru, Taur Matan Ruak atu kontinua.
“Aban bainrua sé prezidente deside atu kria IX Governu preparadu nafatin hanesan parseiru FRETILIN, PLP ho seluk tán atu kontinua to’o 2023, laiha Eleisaun Antesipada,” Alkatiri hatete. (cao)
633 total views, 3 views today
Bele hare Video Seluk :