DILI—Partidu União Demokrata Timorense (UDT), hala’o ona konferénsia extraordinária iha loron Domingu (08/03/2020), iha Sede Nasionál Partidu nian iha Palapasu, Dili.
Rejultadu husi konferénsia ne’e reafirma pozisaun integra ba koligasaun foun ne’ebé invole CNRT, PD, KHUNTO, FM, PUDD no UDT rasik, ne’ebé asina ona paktu koligasaun iha loron 22 Marsu 2020, iha Sede Nasionál, CNRT iha Bairro dos Grilhos, Dili.
Sekretáriu Jerál UDT, Francisco David Xavier Carlos, afirma, pozisaun ne’ebé partidu foti hodi hatan ba preokupasaun Prezidente Repúblika Francisco Guterres Lú Olo kona-ba legalidade koligasaun ne’ebé lidera husi Kayrala Xanana Gusmão hodi hakotu impase polítika iha rai laran ho formasaun governu dasia ne’ebé metin.
“Pozisaun UDT nian hamutuk ho koligasaun ne’ebé lideradu hosi Maun Boot Xanana Gusmão hosi CNRT hamutuk ho KHUNTO, FM, PD no PUDD,” Francisco hatete ba Timor Post iha Sedé Nasionál UDT.
Francisco haktuir, konferénsia loron ida ne’e hola parte hosi sekretáriu ezekutivu husi munisípiu sira, órgaun feto UDT no órgaun Juventude UDT.
“Atu informa ba udetista iha teritóriu laran tomak kona-ba pozisaun UDT nian iha momentu ida ne’e apoiu tomak iha koligasaun ida ne’ebé lideradu hosi maun Bo’ot Xanana Gusmão, ne’e para atu asegura uma boa governasaun ida di’ak no kualidade ba to’o 2023,” Francisco subliña.
Konferénsia hanesan hala’o ona husi CNRT iha loron Sábadu (07/03/2020), PD hala’o ona iha fulan Fevereiru 2020. Partidu seluk husi koligasaun foun sei hala’o mós konferénsia hanesan hodi informa fali ba prezidente repúblika no indizita primeiru ministru foun no forma estrutura governu no simu pose. (ato)
844 total views, 6 views today
Bele hare Video Seluk :