DILI—Rekejitu sira ne’ebé koligasaun foun tenke prienxe tuir Prezidente Repúblika Francisco Guterres Lú Olo nia preokupasaun, aleinde koligasaun tenke tuir lei partidu polítiku, tenke garante mós estabilidade governativa.
“Formasaun governu foun ida mós tenke garante ninia sustentabilidade to’o rohan, labele iha klaran de’it. Purtantu ida ne’e signifika kondisoens sira ne’ebé ko’alia kona-ba rekejitus legais no jurídiku ne’ebé sei prienxe,” Porta-Vóz Koligasaun Foun atuál Sekretáriu Jerál PD, António da Conceição haktuir ba Jornalista sira hafoin sorumutu ho Prezidente Repúblika Francisco Guterres Lú Olo iha Palásiu Prezidensiál Nicolau Lobato, Bairro-pité, Dili, Sexta (06/03/2020).
António hatete, prezidente repúblika simu dispozisaun koligasaun nian ne’ebé hato’o iha karta ne’ebé atu halo formasaun ba governu foun, maibé tanba prezidente repúblika tau kestaun ba legalidade koligasaun nian maka nia parte sei túr hamutuk fali hodi tetu no fó resposta hikas ba prezidente repúblika.
António dehan, iha aspeitu polítiku, koligasaun prienxe ona rekejitus tanba iha ona maioria parlamentar, maibé haree ba lei partidu polítiku, prezidente repúblika husu atu partidu sira iha koligasaun tenke avansa liuhusi konferénsia ida.
“Iha aspeitu polítiku koligasaun iha ona kondisoens tanba iha ona partidu neen mak hamutuk forma koligasaun foun ba harii governu ida, maibé tuir lei partidu polítiku tenke liuhusi konferénsia, tanba ne’e maka koligasaun seidauk iha pozisaun hodi bele hatan kedas ba prezidente repúblika,” António salienta.
Tanba ne’e, António dehan, koligasaun lideradu Xanana Gusmão seidauk iha data fiksu atu túr hamutuk fali ho partidu sira iha koligasaun hodi prienxe rekijitu sira hodi fó resposta hikas ba prezidente repúblika.
Entretantu Primeiru Ministru atual Taur Matan Ruak aprejenta tiha ona pedidu rejignasaun ba prezidente repúblika iha loron Tersa (25/02/2020). Liu ona semana hirak prezidente repúblika seidauk dekreta pedidu rejignasaun ne’e.
Governu daualu lideradu Taur Matan Ruak monu tanba orsamentu jerál estadu 2020 nian xumba iha parlamentu nasionál hafoin CNRT la a favor. Koligasaun ne’ebé hahoris governu daualu maka CNRT, PLP no KHUNTO liuhusi eleisaun antesipada 2018.
Rajaun CNRT fó pozisaun ne’e tanba nia membru na’in hitu durante tinan rua governu daualu la hetan pose husi prezidente repúblika. No konsidera governasaun Taur Matan Ruak laiha kapasidade. (cao/yto)
787 total views, 3 views today
Bele hare Video Seluk :
Subscribe to Timorpost
