DILI (Timor Post)–Centro de Estudos para Paz e Dezenvolvimento (CEPAD) hamutuk ho Uniaun Europeia iha Timor-Leste (UE) halo lansamentu Manuál Sidadaun ba dahuluk, hodi suporta komunidade ba asesu informasaun.
Tuir Diretór Ezekutivu CEPAD, João Boavida, hatete objetivu lansamentu ida ne’e ho buat tolu mak importante hanesan, ida atu hakbi’it koñesimentu públiku nian kona-ba sira-nia diretu Konstitusionál hodi hatene, tuir artigu 40 nian iha KRDTL, hodi hatene husu informasaun, no simu informasaun husi Governu, atu nune’e bele hadi’a sira-nia moris loron-loron.
“Objetivu ida seluk mak, atu hakbi’it mós koñesimentu Funsaun Públiku sira ou Governante sira nian, kona-ba sira-nia obrigasaun hodi fó informasaun ba públiku, bainhira públiku husu, ikus liu mak hatuur mós dalan ba sidadaun sira hodi oinsá bele husu informasaun ba Governante sira,” nia dehan ba jornalista sira hafoin remata serimónia lansamentu iha Novo Turizmu, Kuarta (06/07).
Nia hatutan, tanba dala-barak, ema hotu halo konfuzaun entre informasaun ho notísia, ne’ebé rua ne’e lahanesan, nune’e, bainhira Governante balu ko’alia kona-ba informasaun, presiza sidadaun sira atu hatene katak, informasaun ne’e soo bele mai husi Governante sira, ou Liñas Ministérais ne’ebé relevante, tanba sira mak akumula informasaun ba benefísiu Povu nian, no lori osan povu nian hodi hetan informasaun ne’e, no osan atu gasta ba oinsá atu hadi’a moris iha setór Polítiku, Ekonómiku, Sosiál no Kultura, nune’e, husi informasaun ne’e soo bele mai husi Governante sira.
Nia haktuir, durante ne’e ema barak mak asesu ba notísia ne’e, soke asesu ba informasaun ne’ebé bele benefísiu komunidade no sidadaun sira atu hadi’a sira nia moris, maibé hanoin ne’e uitoan de’it.
“Husi peskiza daudaun ami halo, bainhira ami tuur hamutuk ho komunidade sira atus 2 resin iha nivel territóriu tomak, so de’it 25% mak koñese artigu 40 KRDTL nian, ne’e atu dehan, 25% artigu ida ne’e, mais sira lahatene importánsia artigu ninian kona-ba oinsá artigu ne’e bele hadi’a sira ninia moris, karik sira hamriik komesa husi informasaun hodi hadi’a sira moris loron-loron,” nia relata.
Nune’e, CEPAD atu rekomendasaun espesiál ba Governu mak, tuir nia hanoin Governu nia kolaborasasun kontinua nafatin dezde programa ida ne’e implementa, tanba husi parte sira serbisu hamutuk ho reprezentante Liña Ministeriál 7, kompostu husi Ministériu Saúde (MS), Ministériu Edukasaun, Juventude no Desportu (MEJD), no Ministériu hirak seluk, no Ministériu Finansas (MF) liuhusi Alfandega, Ministériu Solidariedade Sosiál no Inkluzaun (MSSI) mak halo parte grupu nasionál ba Boa-Governasaun CEPAD nian.
Enkuantu husi peskiza ne’ebé CEPAD halo durante kuaze tinan rua, ho ninia pájina hamutuk 20 resin, husi ida ne’e hetan suporta finansia husi UE orsamentu Millaun 1 USD.
Nune’e husi eventu lansamentu ne’e marka prezensa husi Ministru Asuntu Parlamentár no Komunikasaun Sosiál, Francisco Martins da Costa Jerónimo no akompaña husi Sekretária Estadu ba Igualdade no Inkluzaun, Maria do Rosário de Fátima Correia, Embaixadór UE iha Timor-Leste, Andrew Jacobs, Grupu Traballu Nasionál Liberdade Asesu ba Informasaun, no mós reprezentante sira husi komunidade, Pontu Fokál no Funsionáriu Públiku sira ne’ebé mai husi Munisípiu 12 inklui RAEOA, Autoridade Lokál no konvidadu sira seluk mak reprezenta organizasaun sosiedade sivíl no Akademia.
3,197 total views, 3 views today
Bele hare Video Seluk :
Subscribe to Timorpost
