DILI (Timor Post)–Atu kumpre regulamentu hosi Lei Komunikasaun Sosiál (KomSos), Konsellu Imprensa (KI) Timor-Leste, Loke rejistu ba média foun sira ne’ebé foin eziste liuliu ba média online.
Prezidente Konsellu Ministru (KI), Virgílio Guterres, hatete maluk sira foin harii média sira hatene lei Komunikasaun Sosiál (KomSos).
“Ba rejista ofisial, ami bele dehan agora rejistu la’o daudauk, ha’u hanoin ba maluk sira ne’ebé atu harii média, sira hatene lei komunikasaun, ne’ebé regula sidadaun see de’it mak iha hanoin atu harii média, ho objetivu ida atu serbí públiku, liuliu kona-ba konteúdu jornalistiku, tenke haree Lei ne’e, atu nune’e bele hakbesik ba KI hodi rejistu,” nia dehan hafoin remata enkontru ho Prezidente Repúblika, José Ramos Horta, iha Palásiu Prezidensiál, Bairru-Pité Sesta (01/07).
Maibé, nia dehan ba KI portantu mais média mosu barak, ne’e fó opsaun barak liu iha sosiedade hodi bele hetan informasaun, liuliu iha era ne’ebé Online barak, nune’e husi média sira dala-ruma velosidade la konsege halo konfirmasaun, entaun husi média barak ne’e, ema leitór sira ou haree na’in sira ne’e bele halo Lei ida atu ba konfirma seluk, ida ne’e parte ida ne’ebé agora mosu iha mundu ne’e.
“Mais importante maka, ami dehan ba see de’it ou sidadaun see de’it nia liberdade atu harii média ou atu estabelese média, maibé iha ona kuadrus legais husi Lei komunikasaun sosiál ne’ebé regula katak, tenke ba halo rejistu iha KI”, nia hateten.
Nia esplika, rejistu ne’e la’ós hanesan autorizasaun katak atu husu lisensa lae, ne’e mekanizmu administrativu ida, ne’ebé Lei hatete atu ema hatene katak, see maka responsavel, halo saida, no iha ne’ebé, atu nune’e leitór sira bele hatene katak, responsabilidade ba média no fatin ba média ne’e rasik.
“KI agora rejistu ne’e hamutuk média sia (9), mais ami halo update bei-beik, hodi dehan, husi média 9 ne’e sei moris permanente ka lae, dala-ruma iha rejistu ne’e 9, maibé ida ne’ebé efetivamente sei moris ne’e, dala-ruma haat (4) no lima (5) de’it”, nia hakotu.
1,689 total views, 3 views today
Bele hare Video Seluk :