(Reportajen Jeremias Soares/Editor Mateus da Cruz)
DILI—Grupu Investigasaun Sientífiku lidera husi Dosente Fakuldade Agrikultura Universidade Nasionál Timor Leste (UNTL), Brígida Antonia Correia, hala’o peskiza experimental Sorghum iha Vacom Lospalos. Munisípiu Lautem.
Sekretáriu Ezekutivu Institutu Nasionál Siénsia no Teknolojia (INCT sigla portugés), José Cornelio, asina Memorandum of Understanding (MoU) ho Administradór Munisípiu Lautem, Domingos Savio, hodi fasilita peskiza sientífiku nee. MoU nee asina iha loron 09 fulan Juñu nee, iha salaun enkontru Munisípiu Lautem.
Atividade ne’ebé hala’o hafoin asina MoU maka vizita Sekretáriu Ezekutivu INCT ba fatin peskiza iha sentru peskiza Vacom Aldeia Titilari, Suku Fuiloro, Munisípiu Lautem, hodi haree preparasaun ba fatin kuda Sorghum, fatin kakiak Karau Vaka ho sistema intensivu, fatin hakiak Manu Broiler, inklui fatin produsaun biogas utiliza feses Karau Vaka.
Grupu peskizadór neebé lidera husi Dra Brígida Antonia Correia, hetan fiar husi INCT hodi halo peskiza kona-ba produtividade Sorghum hanesan ai-han alternativu ba konsumu ema no animal, tanba kontein elementu nutriente neebé diak ba saúde ema no animal.
Brígida iha esperansa katak ho rezultadu peskiza nee iha futuru Governu bele konsidera no fó atensaun ba dezenvolvimentu Sorghum iha Timor-Leste hodi sai ai-han alternativa ba ema no animal.
“Iha esperansa katak ho rezultadu peskiza kona-ba Sorghum, maka iha futuru Governu bele konsidera no fó atensaun ba dezenvolvimentu Sorghum iha Timor-Leste hodi sai hanesan ai-han alternativa ba ema no animal, tanba wainhira konsume ai-han husi sorghum, maka bele konserva ema nia saúde, liuliu ba ema neebé iha kolesteról, diabétiku no seluk tan”, Brígida informa ba Timor Post, Sesta (10/06).
Xefe Grupu Peskizadór nee dehan, sorghum mós bele halo produtu seluk hanesan Sabaun, Masin Midar, Farina no seluk tan.
1,606 total views, 3 views today
Bele hare Video Seluk :