Dili (Timor Post)— Komisaun Anti Korrupsaun (CAC-Sigla Portugés) suspende prosesu rekrutamentu Guarda Florestál hamutuk na’in 184 no hahú prosesu investigasaun kriminál.
Desizaun ida ne’e foti hafoin Komisáriu Adjuntu Komisaun Anti Korrupsaun ba Asuntu Prevensaun no Sensibilizasaun Luis de Oliveira Sampaio lidera ekipa Quadrilateral; KAK, Komisaun Funsaun Públika (CFP-Sigla Portugés), Provedór Direitu Humanus no Justisa (PDHJ) no Inspetur Jerál do Estadu (IGE-Sigla Portugés), Sesta-feira (10/6) ne’e hala’o sorumutu ho Diretór Jerál Floresta no Prezidente Ekipa Juri rekrutamentu nian, Simão Raimundo Mau.
Tuir komunikadu ne’ebé Timor Post Online asesu hosi pájina Facebook KAK nian katak, desizaun suspende prosesu ne’e foti hafoin iha lamentasaun husi públiku ne’ebé iha indikasaun forte kandidatu na’in 20 husi kandidatu 184 ne’ebé liu iha prosesu rekrutamentu ne’e iha indikasaun irregularidade forte.
DG Floresta no prezidente juri Simao Raimundo Mau konkorda suspende rekrutamentu ne inklui halo kanselamentu ba saláriu guarda florestál sira ne’ebé asina ona kontratu.
Indikasaun irregularidade forte ne’e tuir dokumentu ne’ebé CAC no ekipa Quadrilateral simu ona kandidatu balun ne’ebé la liu iha teste selesaun dokumentu no eskrita maibé naran sai iha rezultadu final aprovadu klasifikadu no kontratu asina tiha ona.
Ba interese transparénsia prosesu rekrutamentu iha instituisaun públiku no integridade di’ak membru ekipa juri nian tuir Lei Nu. 7/2020 26 Agostu – Medida Prevensaun no Kombate Korrupsaun (MPCC), Komisáriu Adjuntu CAC Luis Sampaio lori ekipa Quadrilateral nian naran husu ba DG Raimundo Mau atu suspende prosesu rekrutamentu.
Alem de suspende rekrutamentu, husu ba Komisaun rekrutamentu atu fornese informasaun mais detalla no dokumentu hotu relasiona ho prosesu rekrutamentu husi inisiu simu dokumentus to’o publikasaun final naran kandidatu sira nian mai iha CAC tarde liu Sesta-feira loraik tuku 5;30 OTL oras servisu nian.
“CAC la impede prosesu rekrutamentu ida ne’e maibé atu defende transparénsia prosesu rekrutamentu iha instituisaun publiku no integridade no naran di’ak membru juri sira nian. CAC mós labele taka mata ba lamentasaun sira husi publiku ne’ebé sai viral iha media social,” Katak Komisariu Adjunto Luis Sampaio ba prezidenti juri Raimundo Mau durante sorumutu.
Prezidente juri no DG Guarda Floresta Raimundo Mau promote sei kumpri ejijensia CAC nian hodi lori dokumentus hotu relasiona ho prosesu rekrutamentu Guarda Floresta nian ne’ebé sai viral iha media social no sai atensaun publiku mai iha edifisiu CAC Farol Sesta-feira loraik ne’e molok tuku 5;30 OTL.
Xefe Unidade Informasaun no Seguransa Euclides Madeira nu’udar unidade servisu sekreta nian iha CAC simu tiha ona informasaun no dokumentu komprovativu balun ne’ebé indika iha duni indikasaun irregularidade durante prosesu rekrutamentu Guarda Floresta ne’ebé ekipa juri komete no sei tuir investigasaun criminal wainhira dokumentus ne’ebé CAC sei simu iha loraik ne’e komprova.
Sorumutu ekipa Quadrilateral ne’e hala’o iha Salaun sorumutu Diresaun Jerál Floresta nian iha Gabineti Vice-Ministro Agrikultura Kaikoli, Dili. (*)
837 total views, 3 views today
Bele hare Video Seluk :
Subscribe to Timorpost
