(Reportajen Estaziadu Mariano Abi/Editor Mateus da Cruz)
Dili (Timor Post) – Primeiru Ministru Taur Matan Ruak, rekoñese to’o ohin loron estadu seidauk iha kapaidade atu kria empregu ba joven sira nune’e halo joven barak maka kontinua ba buka servisu iha rai liur hodi sustenta an, família no kontribui ba dezenvolvimentu nasaun.
“Ita nia nasaun foin nurak, foin tinan 20, la iha kapasidade hodi kria empregu ba ita joven sira hotu,” Primeiru Ministru, Taur Matan Ruak, reafirma ida ne’e, hafoin halo enkontru semanál ho Prezidente Repúblika, Jose Manuel Ramos Horta, iha Palásiu Prezidensiál, Bairopite, Kinta (09/06).
Nia hatete, nu’udar xefe governu, nia apresia tebes ho sakrifísiu dedikasaun timoroan sira ne’ebe mak esforsu aan sai ba rai li’ur, hodi kontribui ba dezenvolve rai ida ne’e.
“Apresia, sakrifika ba ita nia joven sira ne’ebé mak halo esforsu ba iha rai liur, hodi kontribui ba dezenvolvimentu ita nia nasaun nian,” nia dehan.
Xefe Governu ne’e konsidera joven sira maka heroi, tanba sira fó kontribuisaun dezenvolvimentu maka’as loos ba nasaun tanba kada tinan joven sira kontribui dolar amerikanu millaun 121 USD ba ekonomia rai laran.
Nia kompromete katak, governu sei kontinua esforsu nafatin buka dalan hodi halo parseria ho nasaun barak la’ós de’it Korea no Australia maibé mós ba nasaun sira seluk hanesan Inglaterra, Irlanda, Japaun no nasaun sira seluk tan hodi nune’e joven sira bele ba servisu hodi dezenvolve nasaun no ajuda kresimentu ekonómiku hodi ajuda kombate kiak no mukit iha rai laran.
Nia husu ba traballadór sira, maski servisu maka’as maibé kontinua estuda nafatin hodi labele lakon oportunidade iha area edukasaun. (Lee Notísia Seluk Iha Jornál Timor Post/ Asesu You Tube Timor Post)
849 total views, 3 views today
Bele hare Video Seluk :