(Reportajen Jaime Pires/Editor Mateus da Cruz)
DILI (Timor Post)- Tanba Komisaun Delegasaun Timor-Leste ba Expo-Dubai rekolla tais ba budu iha kontentor laran no la konsege lori ba expo Dubai, na’in husi grupu suru tais sisi governu atu fó osan ba sira.
“Ha’u hakarak husu de’it ba Ministru Expo-Dubai ne’e hotu ona ka seidauk, tuir ha’u nia hatene hotu ona iha fulan Marsu liubá, ha’u husu tanba inan sira ne’ebé mak soru tais ne’e hein hela sira nia osan, tanba momentu ne’ebá ne’e sira komisaun foti sira nia tais,” dehan Deputada bankada CNRT, Lucia Taeki, liuhusi Plenaria Parlamentu Nasionál.
Nia hatete, grupu soru tais sra ne’e hanoin sira nia tais ne’ebé mak komisaun foti ne’e ema sosa hotu ona iha Dubai, tanba ne’e mak sira husu Governu tenke fó osan, maibé to’o agora osan seidauk fó.
“Agora daudaun dehan tais kuaze 400 resin dehan tau de’it iha kontentor, ita imajina inan sira soru tais dehan sira nia tais to’o iha Dubai maibé realidade tais foti ba tau de’it iha kontentor iha Dili de’it,” Nia lamenta.
Nia hatutan, komisaun sira ba rekolla sira nia tais ne’e kuaze fulan neen besik tinan ida ona maibé mai tau de’it iha Dili, grupu soru tais sira telefone mai nasionál maibé hosi nasionál dehan mai foti rasik iha Dili.
“Ida ne’e mak dehan rezultadu ba partisipa iha Expo-Dubai ne’e di’ak, tanba ne’e husu ba governu se bele fó fali grupu ne’ebé mak soru tais ne’e ninian, tanba rai de’it iha kontentor aat tiha se mak responsavel,” hakotu. (Lee Notisia Seluk Iha jornal Timor Post/Asesu You Tube Timor Post)
962 total views, 3 views today
Bele hare Video Seluk :