ADVERTISEMENT

PD; Moris Hosi Ran Resisténsia no Fó Ran ba Estadu de Direitu Demokrátiku

Timor Post - Opiniaun
  • Share
Bandeira Partido Democratico

Hosi: Nino Pereira

Fundador

ADVERTISEMENT
SCROLL FILA BA NOTISIA


Partidu Demokrátiku (PD) nu’udar partidu polítiku ida iha Timor-Leste ne’ebé kontribui maka’as ba prosesu demokratizasaun no rekonstrusaun estadu de direitu demokrátiku. Partidu ne’e harii iha éra independensia iha loron 10 fulan Juñu tinan 2001. Iha istória hari’i PD, mai hosi prosesu naruk ida iha luta ba libertasaun nasional, liu-liu libertasaun pátria. Figura sira ne’ebé funda partidu mai hosi organizasaun resisténsia juvenil oin-oin mak hanesan RENETIL, FPI (Frente Politika Interna), OPJELATIL, OJETIL, FITUN, SAGRADA FAMILIA, DPP IMPETTU, UJTL, DSMPTT, no FORSAREPETIL. Tan ne’e, ho ran resisténsia ne’ebé sulin maka’as iha isin-lolon figura jovens no vizaun ne’ebé nakloke hodi hateke ba futuru, ejize duni pensamentu foun ida hari’i forsa polítika atu asegura fundasaun demokrasia iha uma mahon Repúblika Demokrátika Timor-Leste (RDTL).

Hahalok patriotismu no nasionalismu ne’ebé jovens resisténsia sira hatudu hodi hari’i PD nu’udar afirmasaun polítiku atu fó kontinuasaun ba mehi bo’ot heroi nasaun sira ne’ebé sakrifika ona sira-nia moris. Afirmasaun polítika ne’e mak baze prinsipál ba mehi bo’ot libertasaun nasional total no kompleta. Ho mehi bo’ot mak fanun ispiritu sakrifisiu, fraternidade, toleránsia, lealdade, dedikasaun no integridade hodi luta no defende ba soberania lolós Timor-Leste. Identidade nu’udar jerasaun kontinuador, jovens hirak ne’e iha espetativas bo’ot hamutuk ho jerasaun fundador RDTL ne’ebé matan sei moris.

Fundadores  PD mai  ho hanoin fundamental katak  independensia ne’ebé ita sosa karun tebtebes hodi ran no ruin, tan ne’e presija kuidadu tebes atu Timor-oan hotu-hotu goja ukun rasik aan ne’e ho  liberdade no responsabilidade. Independensia nu’udar ponte osan mean atu liga esperansa foun Timor-oan hothotu ba realidade moris diak iha futuru. Esperansa foun iha iklima independensia ita hotu tenke respeita no tane aas. Ita labele hafoer independensia ne’e ho hahalok no lia-fuan ne’ebé sobu fali unidade nasional. Ho polítika ne’ebé la-lós no asaun ne’ebé kontraprodutivu mak sei hafoer fali imajen ukun rasik aan ne’e.

Lee Mós :
Funsionáriu Kazual MCI Na’in 185 Termina Kontratu

Iha prosesu konstrui uma PD, wainhira CNRT (Concelho Nacionál da Resisténcia Timorense) disolve iha 9 Juñu 2001, iha loron tuir mai PD mós hamrik nu’udar partidu polítiku iha Nasaun independensia Timor-Leste. Loron 10 Juñu 2001 sai nu’udar data istóriku no monumental ba deklarasaun ofisial PD entrega ba RDTL iha Balai Prajurit (agora edifisiu GMNTV), no hosi data refere, jornada polítiku PD hahu lao mai to’o ohin loron.

Wainhira PD hamrik, fó duni anin fresku ba prosesu demokratizasaun. Prosesu ne’e fó liberdade ba Timor-oan sira hodi kanaliza aspirasaun polítiku liu-hosi organizasaun polítiku ida. PD fó esperansa foun ne’ebé bo’ot tebes ba sosiedade foun. Sosiedade ne’ebé moris iha ambiente liberdade no independensia. Tan ne’e, atu konstrui sosiedade foun hodi transforma aan ba sosiedade demokrátiku, sivilizadu no modernu, presija tebes instrumentu polítiku ne’ebé bele kuda kultura demokrasia bazeia ba prinsipius no valóres moris sosiedade ne’e nian. Valóres no prinsipiu ne’ebé abut nanis iha sosiedade mak sai nu’udar identidade sósiu-kultural ne’ebé Timor-oan hothotu komunga no pratika iha moris loron-loron.

Lee Mós :
Natal No Tinan Foun Símbolu Unidade Iha Família

Prezensa PD lidera hosi Fernando LA SAMA de Araújo nu’udar Presidente no Mariano ASANAMI Sabino nu’udar Sekretáriu Jerál, hetan duni apresiasaun ne’ebé maka’as mai hosi povu maubere no lideres partidu polítiku seluk. Maske nune, iha mós lia-balun ne’ebé la dún furak hodi disakredita prezensa PD iha konfigurasaun polítiku nasional pos-independensia. Lider polítiku balun hateten figura PD sira foin mak atu aprende halo polítika, PD partidu sei is susu-ben hela. Maibé, ho lia-fuan sira ne’e la hamate vontade polítiku lider PD sira atu kontinua servisu maka’as hodi habelar ezistensia PD ba to’o iha nivel baze.

Ho mehi ne’ebé bo’ot no luku-aan iha sofrementu povu Timor-Leste, lider sira iha PD kontinua bo’ok an ho fuan bo’ot, servisu la-hatane oras hodi kontinua habelar diresaun estrutura to iha nivel baze. Iha prosesu habo’ot PD iha baze, ekipa PD hasoru obstaklu no dezafius oin-oin ho ameasas fíziku no naun-fíziku. Kuadrus no Militantes PD lubun ida mak hetan agresaun fíziku, baku, tuda (ho fatuk no bomba molotov), tolok no insultu, sunu uma, tesi rin bandeira no hahalok at seluk sira tenke simu nu’udar konsekuensia nu’udar ema polítiku. Liu hosi ameasas ba kuadrus no militantes PD hatudu nafatin fuan-bo’ot hodi tolan moruk hotu ne’ebé iha tuir saida mak Saudozo Presidente LA SAMA sempre dehan bebeik tenke tolan moruk sira ne’e hodi halo PD sai maduru liu-tan iha futuru.

Domin ne’ebé Saudozo LA SAMA nu’udar Presidente PD primeiru iha tempu nebá no ASANAMI nu’udar Sekretáriu Jerál hatudu, fó duni impaktu bo’ot ba sosiedade Timor Lorosa’e ne’ebé sempre hahii kultura respeita malu no simu malu. Ho istilus lideransa sira nain rua nian mak sai nu’udar mata dalan ba kuadrus no militantes PD atu kontinua halakan ispiritu ne’e iha sira nia jornada moris nu’udar ema polítiku. Tan ne’e LA SAMA sempre koalia katak PD mak partidu domin, PD mak partidu dame no PD mak partidu dezenvolvimentu. Ho afirmasaun ida ne’e, maka ita bele dehan katak PD moris hosi ran resistensia ne’ebé sei la nega ran ne’e rasik no oferese ran ne’e hodi hamoris dezenvolvimentu iha ambiente demokrasia, domin no hakmatek nia laran. PARABENS BA ANIVERSÁRIU PD BA DALA 21.***

Lee Mós :
Firaku-Kaladi “Fratelli Tutti” (III: Patriotismo Constitucional): Preâmbulo CRDTL dehan “... desenvolvimento de uma sociedade solidária e fraterna”

Kuadrus no Militantes PD lubun ida mak hetan agresaun fíziku, baku, tuda (ho fatuk no bomba molotov), tolok no insultu, sunu uma, tesi rin bandeira no hahalok at seluk tan. Buat sira ne’e tenke simu nu’udar konsekuensia nu’udar ema polítiku. Liu hosi ameasas ba kuadrus no militantes PD, maibé sira hatudu nafatin fuan-bo’ot hodi tolan moruk hotu ne’ebé iha, tuir saida mak Saudozo Presidente LA SAMA sempre dehan bebeik tenke tolan moruk sira ne’e hodi halo PD sai bo’ot no maduru liu-tan iha futuru.

 4,295 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “PD; Moris Hosi Ran Resisténsia no Fó Ran ba Est…” A few seconds ago

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No