(Reportajen Estaziadu Mariano Abi/Asistente Editor Hermenegildo da Costa Tilman)
Dili (Timor Post)–Institutu Fundasaun Cristal (ISC) komemora loron aniversáriu ba da-38 ho inaugura Edifísiu foun ho andár tolu.
Prezidente Ezekutivu ISC, Agostinho Dos Santos Gonçalves, hatete, aniversáriu ISC ba dala 38 ne’e, prezente boot ne’ebé Fundasaun Kristal simu iha komemorasaun aniversáriu ne’e, mak edifísiu foun ho andár tolu.
“Prezente boot ne’ebé Fundasaun Kristal simu iha komemorasaun Aniversáriu, ne’e mak edifísiu foun Institutu Superior Cristal (ISC) andár tolu, ne’ebé inaugura nó bensaun husi Arsebispu Metropolitanu Arkidioseze Dili, Kardeál Virgílio do Carmo Da Silva SDB”, dehan Presidente Ezekutivu ISC liu husi ninia diskursu, iha kampu Desportu Kristal, Segunda lokraik (06/06).
Prezidente ne’e haktuir, ohin loron festa no loron ksolok ba família boot Fundasaun Kristal, tanba dezde inisiu harii instituisaun iha 5 Juñu 1984 to agora tinan 38 instituisaun ne’e nafatin moris hodi eduka no evanjelizador ba foin sa’e sira iha nasaun ne’e.
Iha fatin hanesan, Arsebispu Metropolitanu Arkidioseze Dili, Kardinál Virgílio do Carmo da Silva SDB, iha ninia omilia dehan, loron ida ne’e, loron importante tebes, tanba tinan rua tan sei hakat ba ninia ezidesima aniversáriu, tanba iha momentu ida hanesan ne’e, ita bele dehan, momentu diak la’ós ita atu ko’alia barak, no la’ós atu halo buat oi-oin, maibé sentimentu ne’ebé mak ita lori mai haksolok hamutuk iha família boot ida ne’e mak atu fó obrigadu no agradese.
“Momentu istóriku hanesan ne’e, ita mós bele husu ba ita, oinsá mak bele agradese, nune’e dalan atu fó obrigadu diak liu maka oinsá mak agradese, tanba ho agradese mak dalan ida ne’ebé mak loos liu,” nia afirma.
Entretantu, Vise Reitór, Jacinto Oliveira Junior, katak, investimentu dezenvolvimentu ba iha setór edukasaun mak investimentu ba rekursu humanu oinsá mak prepara diak liu tan rekursu umanu iha Timor Leste, liu husi area edukasaun rasik.
Tanba ne’e mak ohin loron instituisaun ida ne’e, marka tan istória ida hodi inaugura edifísiu foun ne’ebe ho prizes tolu (Lantai 3) atu bele prepara tan kualidade, liu husi prepara sala de aula ne’ebé mak ho nia fasilidade kompletu.
“Ami hanesan instituisaun edukativa ida ne’ebe mak privadu, hakarak tebes kontribui dezenvolvimentu iha rai doben ida ne’e, tanba ne’e, mak ami hamriik ona durante nia ezisténsia tinan 38, hakarak atu dezenvolve ita nia rekursu umanu Timoroan sira.
Orsamentu ne’ebé gasta ba edifísiu foun ne’e mak kuaze dolar amerikanu 1 millaun, no edifísiu ne’e, hahú iha tinan 2018 lansa fatuk dahuluk no finaliza iha 2022 uma ne’e rasik iha sala 16, iha sala ida ISC fahe ba rua, tanba atu uza ba laboratóriu no fatin pratika, no ba futuru sira, iha mós klínika ne’ebé mak iha. (Lee Notísia Seluk Iha Jornál Timor Post/ Asesu You Tube Timor Post)
717 total views, 3 views today
Bele hare Video Seluk :
Subscribe to Timorpost
