(Reportajen Cardenio Alves/Asistente Editor Hermenegildo da Costa Tilman)
Dili (Timor Post)— Hafoin liu hosi teste eskrita no teste interview durante fulan hirak nia laran, ikus mai kandidatu traballadór hamutuk na’in 300 pasa ona selesaun hodi ba servisu iha Dubai, Qatar.
“Ita rekruta ona kliente atus-tolu 300 ne’ebé liu ona teste interview, no konvida sira mai hodi partisipa informasaun ne’e, atu prepara sira nia dokumentu ne’ebe sira presiza, no mós ba fatin ne’ebe sira hela no sira servisu ba no mós kondisaun saláriu sira, tanba ne’e mak ita bolu kliente sira mai asesu informasaun sira ne’e”, dehan Diretór Ezekutivu Incanto Grup, Joanico Jerónimo, Iha servisu fatin Lesidere.
Diretór Incanto Grup ne’e hatete, hosi kandidatu traballadór na’in 300 ne’e, na’in 172 sei dezloka uluk ba Dubai, Qatar hodi hahú servisu entretantu sira seluk sei dezloka iha tempu tuir mai.
Traballadór sira ne’ebé atu ba servisu iha Dubai-Qatar, maioria serbisu iha kompañia Amerikana iha Quait, Kompañia Sultan, servisu kona-ba Fast Food, KFC, McDonald’s, Star Bark, Hotel, Supermarket no Duty Free Airports Qatar.
Kandidatu Traballadór sira bainhira servisu ona iha fatin sira ne’e sei simu saláriu kuaze 500 USD, maibé bainhira saláriu aumenta ne’e depende ba kliente sira nia esforsu.
Traballadór sira sei hetan fasilidade hanesan transporte, hela fatin no hahán to’o kontratu tinan rua.
“Ha’u garantia ba traballadór Timor oan atus-tolu ne’ebé sei ba servisu iha Dubai no Qatar, fiar katak sira sei hatudu ezemplu di’ak no furak iha ema nia nasaun atu nune’e ema nafatin tau konfiansa mai ita hodi haruka nafatin ita nia joven sira ne’ebé hakarak ba servisu iha ne’ebá”, nia hatete. (Lee Notísia Seluk Iha Jornál Timor Post/ Asesu You Tube Timor Post)
1,207 total views, 9 views today
Bele hare Video Seluk :