DILI—Prezidente Repúbliku Fracisco Guterres Lú Olo lakohi fo komentáriu barak kona-bá pedidu rejignasaun Taur Matan Ruak husi kargu Primeiru Ministru governu daualu, ne’ebé ho rajaun iha ona koligasaun foun ba formasaun governu dasia.
“Ha’u la ko’alia kona-bá ida ne’e. Obrigadu!” Lú Olo afirma ba jornalista sira hafoin partisipa misa ba selebrasaun sinjas iha Igreja Katedral, Dili, Kuarta (26/02).
Maske nune’e, tuir fonte kredivel Timor Post nian iha palasiu prezidensial haktuir, hafoin simu karta rejignasaun husi Taur, Lu Olo lakohi dekreta no mantein ho deklarasaun antes katak Taur kontinua hanesan Primeiru MInistru to’o hakotu impase politika iha rai laran.
Antes ne’e Lú Olo hatete, Taur Matan Ruak kontinua hala’o kna’ar to’o hakotu impase polítika iha rai laran, maibé iha loron Tersa (25/02/2020), Taur aprejenta ona karta rejignasaun ba Prezidente Repúblika iha Palásiu Prezidensiál Nicolau Lobato, Bairro-pité, Dili.
Ho pedidu ne’e, tuir konstituisaun Artigu 86 kona-ba kompeténsia prezidente repúblikakona-ba órgaun sira seluk, maka Prezidente Repúblika sei hola desizaun hodi halo demisaun ba governu daualu.
Hafoin aprejenta karta rejignasaun ba Lú Olo, ba Jornalista sira Taur hatete, nia kontinua hala’o kna’ar to’o prezidente repúblika dekreta nia pedidu rejignasaun.
Entretantu líder máximu husi partidu neen inklui CNRT, PD, KHUNTO, UDT, FM no PUDD asina ona akta koligasaun iha Sede Nasionál Partidu CNRT, Bairro dos Grilhos, Dili, iha loron Sábadu (22/02/2020).
Prezidente CNRT, Kayrala Xanana Gusmão hatete, partidu neen ne’e hatudu iha ona forma ba formasaun governu foun hodi nune’e bele hakotu impase polítika atuál.
Entretantu iha loron Sesta (21/02/2020), Prezidente Repúblika Francisco Guterres Lú Olo, afirma, prontu fó apoiu ba kualkér koligasaun foun ne’ebé forma husi partidu polítiku sira atu forma Governu foun.
Lú Olo dehan, governu foun ne’ebé iha hodi hakat liu impase polítika rai-laran.
“Ha’u hanoin importante maka partidu polítiku sira buka malu ba, depois maka bele fó hatene ba Prezidente Repúblika, kona-ba Governu ida ne’ebé maka sente ba di’ak atu bele lori ita-nia rai ne’e bá-oin. Prontu, Prezidente Repúblika sempre fó apoiu nafatin, atu ita bele ultrapasa krize ida-ne’e, atu bele hadi’a fali ita-nia Governu. Ita hakarak iha governasaun ida-ne’ebé sustentável durante tinan rua ka tolu nia laran, hodi iha fali orsamentu, iha fali programa atubele hala’o dezenvolvimentu”, Lú Olo subliña. (jxy)
1,076 total views, 3 views today
Bele hare Video Seluk :
Subscribe to Timorpost
