(Reportajen Estaziadu Mariano Abi/Asistente Editor Hermenegildo da Costa Tilman)
Dili (Timor Post) – Sekretáriu Estadu Igualdade no Inkluzaun (SEII) asina nota entendimentu ho grupu benefisiáriu husi munisípiu 12 no RAEOA kona bá apoiu fundu bá grupu benefisiáriu sira iha tinan 2022.
Sekretária Estadu bá Igualdade no Inkluzaun (SEII), Maria do Rosário Fátima Correia, hatete, iha tinan 2019 SEII entrega ona fundu transferénsia públika, ne’ebé mak uza mekanizmu rotativu hodi fó apoiu ba grupu benefisiáriu feto sira iha area rural, atu nune’e, hasa’e ekonomia feto nian liu husi atividade negósiu nian.
“Asina akordu ne’e, ho objetivu atu hakabit feto iha area ekonomia, orsamentu mai husi orsamentu jerál ne’ebe mak governu nian mai husi orsamentu subvensaun públiku, maibé nia nakfila bá iha kategoria rotativa,” nia dehan iha salaun SEII, Kaikoli, Kinta (26/05).
Relasiona ho atividade ida ne’e, atu, feto sira la bele dependente nafatin bá sira nia parseiru, atu prevene-an husi violénsia oi-oin hasoru feto no labarik feto sira iha area rural.
Total suku ba iha tinan ida ne’e hamutuk 72 suku, no tinan kotuk 2021 ninian ita total hamutuk 104 mak hetan ona benefisiáriu ba orsamentu rotativa ne’ebé mak atribui husi subvensaun públiku.
No orsamentu refere sei mai ho rotativa, hanesan uluk Governu anterior mai fó de’it ba suku, depois laiha ona atu ba fali rotativu, mais VIII Governu mai ho pensamentu rotativa katak, iha grupu benefisiáriu sira ne’ebé mak hetan ona osan oan, entaun osan inan ne’e, sei fó fali ba iha grupu benefisiáriu sira ne’ebé mak seidauk hetan oportunidade.
“Ho ida ne’e, ba atividade ne’e depende ba sira nia proposta, balu kuda Modo, suku ropa, hakiak manu, hakiak fahi, nune’e depende ba sira nia proposta ne’ebé mak sira hatama mai. No ohin asina akordu ba osan ne’e, depende ba lukru ne’ebé mak sira hetan, ami la fó tarjeitu katak, tinan ida ne’e tenke hotu, maibé importante maka sira ezekuta ho diak, no karik sira hetan, sei fó fali ba iha grupu sira seluk, hanesan iha Munisípiu Dili no RAEOA nian, maka hetan ona, ne’ebé sira sei transfere ba grupu benefisiáriu sira seluk,” nia dehan.
Iha fatin hanesan, National Disable People’s Organization, Ra’es Hadomi Timor Oan (RHTO), Joaozito do Santos, dehan, Ra’es Hadomi Timor Oan agradese ba SEII tanba oferese ona fundu ho Ra’es Hadomi Timor Oan.
“Liu husi Ra’es Hadomi Timor Oan, sei oferese ba grupu benefisiáriu sira, kada grupu ho montante dolar amerikanu 10 Mill, ninia pagamentu 40%, husi pagamentu halo ona ba iha tinan kotuk, agora sei prosesu pagamentu ba 60%. Maibé ami sei hare sira nia atividade, tanba osan 10 Mill ne’e, SEII fó fiar Mai iha RHTO, ho ida RHTO sei fó fali ba grupu benefisiáriu sira,” nia hakotu.
Diretór Jerál SEII, Armando da Costa informa, tinan ne’e, SEII iha orsamentu hamutuk dolar amerikanu rihun 300.000 USD, ne’ebé mak sei fó bá suku hamutuk 104 ho nia grupu hamutuk 125, ho ida ne’e orsamentu ne’ebé mak atu responde bá grupu hirak ne’e hamutuk 2058 USD.
“Iha tinan ida ne’e ita halo ona prosesu ida, depois anúnsiu bá iha aplikasaun proposta sira bazeia bá suku prioridade ne’ebe mak ita identifika ona, depois iha prosesu ida ne’e, ita halo selesaun bá aplikasaun sira hotu, atu nune’e, bele deside hodi fó apoiu fundu bá tinan ida ne’e,” nia dehan.
Aleinde, orsamentu ida ne’e, SEII identifika ona ba suku benefisiáriu ne’ebé SEII tau prioridade, nune’e la’ós bá suku hotu, maibé ho suku balun mak sira seidauk tau prioridade bá iha tinan ida ne’e.(Lee Notísia Seluk Iha Jornál Timor Post/ AsesuYou Tube Timor Post).
1,116 total views, 3 views today
Bele hare Video Seluk :
Subscribe to Timorpost
