(Reportajen Estaziadu Mariano Abi/Asistente Editor Hermenegildo da Costa Tilman)
Dili (Timor Post)–Relasiona ho problema Ró ne’ebé to’o agora la hala’o ninia operasaun tula pasajeiru ba mai RAEOA-DILI, hodi fó impaktu ba povu nia moris, Movimentu Estudante Tane Oekusi (METO), sei organiza asaun demonstrasaun.
Koordenadór Movimentu Estudante Tane Oekusi (METO), Mateus Lopo, hatete, sei halo demonstrasaun tanba komunidade iha Oekusi agora daudaun ne’e terus liu ona ho sasán folin ne’ebé sa’e maka’as tanba loja na’in sira iha Oekusi la bele asesu mai Dili hodi foti sasán atu lori ba Rejiaun Administrativu Espesiál Oekusi Ambenu (RAEOA).
“Se aban ou bairua Ró ne’e la viajen, Ami sei mobiliza malu husi komunidade Oekusi Oan no estudante Oekusi Oan ne’ebé iha kapitál ami sei halo demonstrasaun hasoru APORTIL, Diresaun Nasionál Transporte Marítima (DNTM), inklui Ministériu ne’ebé mak agora daudaun lidera hela Governu ida ne’e,” Nia hato’o lia hirak ne’e iha Konferénsia Imprensa ne’ebé hala’o iha Portu Dili, Kinta (26/05).
Nia hatete, Komunidade RAEOA agora daudaun enfrenta hela krize ba nesesidade báziku, folin sasán sa’e, hanesan foos, mina, masin, masako, manu tolun, kafé masin midar, seluk-seluk tan, presu mós sa’e hotu, tanba kauza husi Ró la halo operasaun.
Loja na’in sira iha Oekusi la bele asesu mai Dili hodi foti sasán atu lori ba Rejiaun Administrativu Espesiál Oekusi Ambenu (RAEOA) maski Prezidente Autoridade RAEOA, hatama ona sasán bázika ba Oekusi, maibé ne’e normaliza de’it iha Oekusi Villa, nune’e sasán folin ne’e sei afeta nafatin iha sub-rejiaun tolu maka, Oesilu, Pásabe no Nítibe.
Tanba ne’e, nia dehan tan, bainhira iha loron rua tuir mai maka Ró la halao hikas ninia viajen maka METO sei hahú hala’o asaun ne’e. (Lee Notísia Seluk Iha Jornál Timor Post/ Asesu You Tube Timor Post)
1,401 total views, 9 views today
Bele hare Video Seluk :