(Reportajen Estaziadu Mariano Abi/Asistente Editor Hermenegildo da Costa Tilman)
Dili (Timor Post)–Centro Nasionál Chega (CNC-sigla Portugés) asina akordu ho Organizasaun Noun Governamentál (NGO), Empreza Di’ak, hodi fó formasaun ba sobrevivente sira, atu dezenvolve vida ekonomia loron-loron nian.
“CNC asina akordu ho empreza di’ak intensaun atu fó formasaun ba grupu sobrevivente sira, durante CNC identifika no apoiu finanseiru hodi dezenvolve, atu hakbiit sira nia vida loron-loron nian,” Diretór Ezekutivu CNC, Hugo Maria Fernandes, deklara ba jornalista sira iha salaun CNC Balide, Kinta ne’e.
Diretór hatete, NGO empreza di’ak ne’ebe mak iha esperiénsia tinan lima ona, akompaña ita nia grupu negósiu liu-liu ba sobrevivente sira iha Timor laran tomak, kuaze 2.000 ital.
“CNC identifika mak sobrevivente sira iha tempu pasadu balun halo grupu, balun halo negósiu no setór agrikultór nian, setór pekuáriu, tulun sira no hakbiit situasaun ekonomia nian, nune’e iha intensaun boot atu hakbiit sira nia moris loron-loron la bele depende ba Governu, sira nia atividade ka vontade, depois apoiu finanseiru no mós formasaun husi empreza di’ak,” nia informa.
Nia dehan, apoiu finanseiru husi CNC no tékniku husi empreza di’ak grupu sobrevivente sira bele la’o ba oin, la’ós sira sai sobrevivente ba violasaun uluk nian maibé sobrevivente moris loron-loron nian.
Nia informa, daudaun ne’e iha grupu 10 kada grupu iha ema na’in-5, agora apoiu grupu haat mak sai alvu ba apoiu ne’ebe CNC ho empreza di’ak atu fó ba sira.
Nune’e, apoiu ne’ebe CNC atu fó mak, Munisípiu Vikeke, Aileu no Ataúru ba tinan ne’e, tinan kotuk mós apoiu ona grupu haat, husi Munisípiu Ermera, Vikeke, Manatutu no Aileu.
Entretantu, Diretór Ezekutivu NGO Empreza di’ak, Joana da Costa Gusmão, hatete, empreza di’ak sente kontente, tanba servisu hamutuk ho CNC atu fasilita formasaun ba sobrevivente sira hodi hakbiit situasaun ekonomia loron-loron nia.
Nia hakle’an tan katak, objetivu husi atividade ne’e, atu fó formasaun ba sobrevivente sira liu-liu ba atividade ekonomia, durasaun tempu naruk nian laran. Entaun ne’e mak, misaun husi empreza di’ak nian hahú tinan 2010 hala’o servisu liuliu ba atividade ekonomia nian.
“Esperiénsia ne’ebe mak ami iha ami sempre kolaborasaun hamutuk hodi haree atividade sira, atu hetan diak ka susesu iha futuru mai,” nia hakotu. (Lee Notísia Seluk Iha Jornál Timor Post/ Asesu You Tube Timor Post)
813 total views, 3 views today
Bele hare Video Seluk :